نہ مہ و نجوم کی جستجو نہ تو کہکشاں کی تلاش ہے

نہ مہ و نجوم کی جستجو نہ تو کہکشاں کی تلاش ہے

تری راہ پر جو نکل پڑا اسی کارواں کی تلاش ہے

میں ہوں بلبلِ چمنِ نبی مری داستان ہزار رنگ

مری خوش نوائی کو نوبہ نوگل زر فشاں کی تلاش ہے

سببِ ارادۂ کن فکاں وہی امن و راحتِ دو جہاں

ہے جو حسرتِ دلِ مرغ جاں اسی آشیاں کی تلاش ہے

لکھوں نعت سرور انبیاء بڑھے رتبۂ فن شاعری

ہے نئی زمین کی جستجو نئے آسماں کی تلاش ہے

ہے وجود صدقۂ نور جب اسے خوفِ بحر عدم ہو کب

نہ سفینۂ غم دل کو اب کسی بادباں کی تلاش ہے

مری جان امین غم و الم مرا دل ہے درد سے آشنا

دُرِ اشک جس میں پرو سکوں اسی ریسماں کی تلاش ہے

ہوں میں شوق سجدہ پہ خود نثار کہ اس جبیں نیاز کو

ترے آستاں کی ہے جستجو ترے آستاں کی تلاش ہے

رہے مستجاب ہدف مرا، چلے تیر بن کے دعا مری

بنے سوز عشق نبی سے جو مجھے اس کماں کی تلاش ہے

چلو برقؔ عاصی و مبتلا طرفِ رسول خدا نما

کہ شفاعت ان کی ہے میزباں اسے میہماں کی تلاش ہے