مجھ کو دکھلائے خدا رنگ و بہار اجمیر

مجھ کو دکھلائے خدا رنگ و بہار اجمیر

بس رہا ہے مری آنکھوں میں دیار اجمیر

جلوہ ماہ سے روشن ہے دیار اجمیر

چاندنی سے بھی ہے بڑھ کر شب تار اجمیر

کاش مجھ سے کوئی پوچھے کہ کہاں جاتے ہو

میں خوشی سے یہ کہوں سوئے دیار اجمیر

سرمہ چشم بصیرت سے وہ خاک اقدس

اپنی آنکھوں میں بھروں کیوں نہ غبار اجمیر

کیوں نہ ہو صفحۂ دل تختۂ باغِ رضواں

کندہ اس لوح پہ ہیں نقش و نگار اجمیر

بھولے بھٹکوں کو بتایا ہے خدا کا رستہ

راہ دکھلا مجھے اے خضر دیار اجمیر

دشتِ اجمیر میں چھڑکاؤ کروں آنکھوں سے

تر ہو اشکوں سے مرے گرد و غبار اجمیر

رحمتِ حق کی گھٹا چار طرف چھائی ہے

جھوم کر اٹھا ہے کیا ابر بہار اجمیر

قدر داں میرے سخن کے ہیں جناب خوجہ

میں سناؤں گا انہیں وصفِ دیار اجمیر

کیوں نہ ہو دست و بغل جا کے نشاط دلگیرؔ

خلوت راز الہٰی ہیں کنار اجمیر