aisi hi intizar mein lazzat agar na ho

aisī hī intizār meñ lazzat agar na ho

to do ghaḌī firāq meñ apnī basar na ho

jaanā ho nāma-bar kā to aanā idhar na ho

tā-fursat intizār se phir umr bhar na ho

qāsid vo bhejiye jise apnī ḳhabar na ho

ai dil vo baat kar ki kisī kā zarar na ho

ilzām kā itaab kā us ke ḳhatar na ho

ye kyā ki chashm-e-mehr udhar ho idhar na ho

kyuuñ kar kahūñ ki lutf kabhī ġhair par na ho

ho bhī to gaah gaah magar is qadar na ho

ārām ho sukūn ho saare jahān ko

jumbish na ho zamīñ kī tarah āsmān ko

maiñ muñh meñ le ke ye kahūñ us kī zabān ko

jab vasl ho nasīb kisī ḳhasta jaan ko

us shab kī tā qayāmat ilāhī sahr na ho

Dar hai sharīk-e-rahm na hoñ dushman-e-hazīñ

tāsīr meñ balā hai mirī āh-e-ātishīñ

dil mom ban ke jaa.e pighal ye bhī kuchh nahīñ

aa.e na farq sañg-dillī meñ tire kahīñ

naale bhī kījiye vo ki jin meñ asar na ho

kis kā shahīd-e-nāz chalā tishna-kām aaj

firdosiyoñ ko hai mae-kausar harām aaj

ġhilmān-o-hūr karte haiñ sab ehtimām aaj

sunte haiñ ḳhuld meñ hai bahut dhuum dhaam aaj

bismil kā tere dahr se azm-e-safar na ho

maiñ vo ki mere naale kaleje nikāl leñ

tū vo ki terī bāteñ suneñ sab to jaan deñ

donoñ balā-e-jāñ haiñ ilaaj is kā kyā kareñ

rone se mere terī adāoñ se bazm meñ

koī nahīñ jo hāthoñ se thāme jigar na ho

jab dekhtā hai lutf tirā jānib-e-adū

tasvīr-e-yās phirtī hai āñkhoñ ke rū-ba-rū

bahtā hai chashm-e-tar se mire ḳhūn-e-ārzū

afsos apne jī se bhulā.e usī ko tū

jis dil ko terī yaad meñ apnī ḳhabar na ho

murjhā ke rah na jaa.e kahīñ tū mujhe hai Dar

nāzuk hai dil tirā kahīñ is par na ho asar

barpā ho hashr aa.eñ talātum meñ bahr-o-bar

sātoñ falak ke TukḌe uḌeñ to uḌeñ magar

faryād-e-ġhair dil meñ tire kār-gar na ho

aafat hai iztirāb to betābiyāñ sitam

āñkheñ bichhā rahā huuñ sar-e-rah qadam-qadam

hamdam tū hī batā mire sar kī tujhe qasam

dil ko nahīñ qarār jo pahlū meñ ek dam

palTā kahīñ udhar se mirā nāma-bar na ho

bejā umiid kī ho kabhī to use sazā

taḌpe tamām raat na paa.e tirā patā

tū mere saath sarf-e-tamāshā ho jā-ba-jā

kyā sair ho jo ġhair se va.ada ho vasl kā

DhūñDe vo sub.h tak tujhe tū apne ghar na ho

aa.e nazar meñ baḌh ke vafā se jafā-e-yār

kam samjheñ ḳhvāhishoñ se sitam-hāye be-shumār

matlab kī hai ye baat batā tū hī ġham-gusār

jaur-o-itāb kyuuñ na saheñ ham hazār baar

lutf-o-karam se bhī jo use dar-guzar na ho

karke lagāvTeñ nazr-e-jahāñ gudāz se

aañsū bahā ke dīda-e-jādū-tarāz se

dikhlā ke ik adā nigah-e-fitna-sāz se

mujh ko hai yaad vasl meñ Dar Dar ke naaz se

kahnā tirā ki dekh kisī ko ḳhabar na ho

mahshar ko tarz-e-nāz-e-sitam-gar samajhte haiñ

fitnoñ ko us ke shoḳhī-e-dilbar samajhte haiñ

kuchh us ko mujh se be-dil-o-muztar samajhte haiñ

sab log jis ko fitna-e-mahshr samajhte haiñ

mujh ko ye ḳhauf hai ki vahī fitna-gar na ho

fāñseñ jigar meñ apne chubhīñ yuuñ to beshtar

barsoñ khaTak sī dil meñ bhī apne rahī magar

betābiyoñ meñ itnī sī lazzat kī kyā ḳhabar

zauq-e-tapish meñ chain kahāñ dil ko chāra-gar

jab tak ki siine meñ ḳhalish-e-neshtar na ho

jaur-e-falak jafā-e-zamāna ġham-e-habīb

in sab balāoñ meñ bhī rahīñ ḳhvāhisheñ ajiib

ban jaa.e jaan par bhī to yā baḳht yā nasīb

yārab mirā sharīk ho jis sadme meñ raqīb

is meñ mazā na ho jo mirī jaan par na ho

ye bhī hai ḳhauf vo na dil-āzurda ho kahīñ

farq aa.e apnī baat meñ tauba bhī kuchh nahīñ

kuchh pās-e-vaz.a-e-dost to kuchh pās-e-ranj-o-kīñ

rakkhā hai us ne sog adū kā to ham-nashīñ

is Dhab se roiye ki palak tak bhī tar na ho

karatā huuñ haal par jo zarā un ke ġhaur maiñ

pahle se dekhtā nahīñ ab un ke taur maiñ

karte haiñ vo karam to samajhtā huuñ jaur maiñ

vo dekhte haiñ baiThe nigāhoñ se aur maiñ

Dartā huuñ koī fitna to madd-e-nazar na ho

duzdīda ik nazar ho lagāvaT kī aañkh se

chorī chhupe kī baat hai dil meñ chhupī rahe

taklīf-e-dast-o-taiġh hai ḳhauf is liye

dushman kahīñ na rashk-e-shahādat se jaan de

yuuñ qatl hoñ ki qatl mirā mushtahar na ho

khaTke har ek aañkh meñ vo baḌh ke ḳhaar se

ye kuchh nahīñ ki haath kisī ke na aa sake

miT jaane par bhī charḳh use pech-o-tāb de

ghul ghul ke ġhair ḳhvāhish-e-ġham se ḳhudā kare

tār-e-nigāh ho magar us kī kamar na ho

lazzat nasīb maut kī ho mujh ko kis tarah

bar aa.e merī hasrat-e-dil kah do kis tarah

rusvā.ī apne ishq kī ho bolo kis tarah

shohrat tumhāre jaur-o-sitam kī ho kis tarah

tash.hīr merī laash agar dar-badar na ho

ye to majāl kyā hai ki ilzām un ko deñ

itnā kahīñ 'riyāz' hamārī jo kuchh suneñ

kyā aa ga.ī hai aaj ye hazrat ke zehn meñ

navvāb rose-e-hashr ḳhudā se shikāyateñ

itnā bhī koī ishq-e-butāñ meñ niDar na ho

aisi hi intizar mein lazzat agar na ho

to do ghaDi firaq mein apni basar na ho

jaana ho nama-bar ka to aana idhar na ho

ta-fursat intizar se phir umr bhar na ho

qasid wo bhejiye jise apni KHabar na ho

ai dil wo baat kar ki kisi ka zarar na ho

ilzam ka itab ka us ke KHatar na ho

ye kya ki chashm-e-mehr udhar ho idhar na ho

kyun kar kahun ki lutf kabhi ghair par na ho

ho bhi to gah gah magar is qadar na ho

aaram ho sukun ho sare jahan ko

jumbish na ho zamin ki tarah aasman ko

main munh mein le ke ye kahun us ki zaban ko

jab wasl ho nasib kisi KHasta jaan ko

us shab ki ta qayamat ilahi sahr na ho

Dar hai sharik-e-rahm na hon dushman-e-hazin

tasir mein bala hai meri aah-e-atishin

dil mom ban ke jae pighal ye bhi kuchh nahin

aae na farq sang-dilli mein tere kahin

nale bhi kijiye wo ki jin mein asar na ho

kis ka shahid-e-naz chala tishna-kaam aaj

firdosiyon ko hai mae-kausar haram aaj

ghilman-o-hur karte hain sab ehtimam aaj

sunte hain KHuld mein hai bahut dhum dham aaj

bismil ka tere dahr se azm-e-safar na ho

main wo ki mere nale kaleje nikal len

tu wo ki teri baaten sunen sab to jaan den

donon bala-e-jaan hain ilaj is ka kya karen

rone se mere teri adaon se bazm mein

koi nahin jo hathon se thame jigar na ho

jab dekhta hai lutf tera jaanib-e-adu

taswir-e-yas phirti hai aankhon ke ru-ba-ru

bahta hai chashm-e-tar se mere KHun-e-arzu

afsos apne ji se bhulae usi ko tu

jis dil ko teri yaad mein apni KHabar na ho

murjha ke rah na jae kahin tu mujhe hai Dar

nazuk hai dil tera kahin is par na ho asar

barpa ho hashr aaen talatum mein bahr-o-bar

saton falak ke TukDe uDen to uDen magar

faryaad-e-ghair dil mein tere kar-gar na ho

aafat hai iztirab to betabiyan sitam

aankhen bichha raha hun sar-e-rah qadam-qadam

hamdam tu hi bata mere sar ki tujhe qasam

dil ko nahin qarar jo pahlu mein ek dam

palTa kahin udhar se mera nama-bar na ho

beja umid ki ho kabhi to use saza

taDpe tamam raat na pae tera pata

tu mere sath sarf-e-tamasha ho ja-ba-ja

kya sair ho jo ghair se wada ho wasl ka

DhunDe wo subh tak tujhe tu apne ghar na ho

aae nazar mein baDh ke wafa se jafa-e-yar

kam samjhen KHwahishon se sitam-haye be-shumar

matlab ki hai ye baat bata tu hi gham-gusar

jaur-o-itab kyun na sahen hum hazar bar

lutf-o-karam se bhi jo use dar-guzar na ho

karke lagawTen nazr-e-jahan gudaz se

aansu baha ke dida-e-jadu-taraaz se

dikhla ke ek ada nigah-e-fitna-saz se

mujh ko hai yaad wasl mein Dar Dar ke naz se

kahna tera ki dekh kisi ko KHabar na ho

mahshar ko tarz-e-naz-e-sitam-gar samajhte hain

fitnon ko us ke shoKHi-e-dilbar samajhte hain

kuchh us ko mujh se be-dil-o-muztar samajhte hain

sab log jis ko fitna-e-mahshr samajhte hain

mujh ko ye KHauf hai ki wahi fitna-gar na ho

fansen jigar mein apne chubhin yun to beshtar

barson khaTak si dil mein bhi apne rahi magar

betabiyon mein itni si lazzat ki kya KHabar

zauq-e-tapish mein chain kahan dil ko chaara-gar

jab tak ki sine mein KHalish-e-neshtar na ho

jaur-e-falak jafa-e-zamana gham-e-habib

in sab balaon mein bhi rahin KHwahishen ajib

ban jae jaan par bhi to ya baKHt ya nasib

yarab mera sharik ho jis sadme mein raqib

is mein maza na ho jo meri jaan par na ho

ye bhi hai KHauf wo na dil-azurda ho kahin

farq aae apni baat mein tauba bhi kuchh nahin

kuchh pas-e-waza-e-dost to kuchh pas-e-ranj-o-kin

rakkha hai us ne sog adu ka to ham-nashin

is Dhab se roiye ki palak tak bhi tar na ho

karata hun haal par jo zara un ke ghaur main

pahle se dekhta nahin ab un ke taur main

karte hain wo karam to samajhta hun jaur main

wo dekhte hain baiThe nigahon se aur main

Darta hun koi fitna to madd-e-nazar na ho

duzdida ek nazar ho lagawaT ki aankh se

chori chhupe ki baat hai dil mein chhupi rahe

taklif-e-dast-o-taigh hai KHauf is liye

dushman kahin na rashk-e-shahadat se jaan de

yun qatl hon ki qatl mera mushtahar na ho

khaTke har ek aankh mein wo baDh ke KHar se

ye kuchh nahin ki hath kisi ke na aa sake

miT jaane par bhi charKH use pech-o-tab de

ghul ghul ke ghair KHwahish-e-gham se KHuda kare

tar-e-nigah ho magar us ki kamar na ho

lazzat nasib maut ki ho mujh ko kis tarah

bar aae meri hasrat-e-dil kah do kis tarah

ruswai apne ishq ki ho bolo kis tarah

shohrat tumhaare jaur-o-sitam ki ho kis tarah

tashhir meri lash agar dar-badar na ho

ye to majal kya hai ki ilzam un ko den

itna kahin 'riyaz' hamari jo kuchh sunen

kya aa gai hai aaj ye hazrat ke zehn mein

nawwab rose-e-hashr KHuda se shikayaten

itna bhi koi ishq-e-butan mein niDar na ho