jahan mein hain ’ibrat ke har-su namune

jahāñ meñ haiñ ’ibrat ke har sū namūne

magar tujh ko andhā kiyā rañg-o-bū ne

kabhī ġhaur se bhī dekhā hai tū ne

jo mā’mūr the vo mahal ab haiñ suune

jagah jī lagāne kī duniyā nahīñ hai

ye ’ibrat kī jā hai tamāsha nahīñ hai

mile ḳhaak meñ ahl-e-shāñ kaise kaise

makīñ ho ga.e lā-makāñ kaise kaise

hue nāmvar be-nishāñ kaise kaise

zamīñ khā ga.ī naujavāñ kaise kaise

jagah jī lagāne kī duniyā nahīñ hai

ye ’ibrat kī jā hai tamāsha nahīñ hai

zamīñ ke hue log paivand kyā kyā

mulūk-o-huzūr-o-kHudā-vand kyā kyā

dikhā.egā tū zor tā-chand kyā kyā

ajal ne pachhāḌe tanomand kyā kyā

jagah jī lagāne kī duniyā nahīñ hai

ye ’ibrat kī jā hai tamāsha nahīñ hai

ajal ne na kisrā hī chhoḌā na daarā

usī se sikandar sā fāteh bhī haarā

har ik le ke kyā kyā hasrat sudhārā

paḌā rah gayā sab yahī ThāTh saarā

jagah jī lagāne kī duniyā nahīñ hai

ye ’ibrat kī jā hai tamāsha nahīñ hai

yahāñ har ḳhushī hai mubaddal ba-sad ġham

jahāñ shādiyāñ thiiñ vahīñ ab haiñ mātam

ye sab har taraf inqilābāt-e-'ālam

tirī zaat hī meñ taġhayyur meñ har dam

jagah jī lagāne kī duniyā nahīñ hai

ye ’ibrat kī jā hai tamāsha nahīñ hai

tujhe pahle bachpan meñ barsoñ khilāyā

javānī ne phir tujh ko majnūñ banāyā

buḌhāpe ne phir aa ke kyā kyā satāyā

ajal terā kar degī bilkul safāyā

jagah jī lagāne kī duniyā nahīñ hai

ye ’ibrat kī jā hai tamāsha nahīñ hai

yahī tujh ko dhun hai rahūñ sab se baalā

ho zīnat nirālī ho fashion nirālā

jiyā karatā hai kyā yūñhī marne vaalā

tujhe husn-e-zāhir ne dhoke meñ Daalā

jagah jī lagāne kī duniyā nahīñ hai

ye ’ibrat kī jā hai tamāsha nahīñ hai

vo hai ’aish-o-'ishrat kā koī mahal bhī

jahāñ taak meñ har ġhhaḌī ho ajal bhī

bas ab apne is jahl se tū nikal bhī

ye tarz-e-ma’īshat ab apnā badal bhī

jagah jī lagāne kī duniyā nahīñ hai

ye ’ibrat kī jā hai tamāsha nahīñ hai

ye duniyā-e-fānī hai mahbūb tujh ko

huī vaah kyā chiiz marġhūb tujh ko

nahīñ 'aql itnī bhī 'majzūb' tujh ko

samajh lenā ab chāhiye kHuub tujh ko

jagah jī lagāne kī duniyā nahīñ hai

ye ’ibrat kī jā hai tamāsha nahīñ hai

buḌhāpe se pākar payām-e-qazā bhī

na chauñkā na chetā na sambhlā zarā bhī

koī terī ġhaflat kī hai intihā bhī

junūñ tābkai hosh meñ apne aa bhī

jagah jī lagāne kī duniyā nahīñ hai

ye ’ibrat kī jā hai tamāsha nahīñ hai

na dil-dāda-e-she'r-goī rahegā

na girvīda shora-jūī rahegā

na koī rahā hai na koī rahegā

rahegā to zikr-e-nikoī rahegā

jagah jī lagāne kī duniyā nahīñ hai

ye ’ibrat kī jā hai tamāsha nahīñ hai

jab us bazm se uTh ga.e dost aksar

aur uThte chale jā rahe haiñ barābar

ye har vaqt pesh-e-nazar jab hai ye manzar

yahāñ par tirā dil bahaltā hai kyuuñ kar

jagah jī lagāne kī duniyā nahīñ hai

ye ’ibrat kī jā hai tamāsha nahīñ hai

jahāñ meñ kahīñ shor-e-mātam bapā hai

kahīñ fikr-o-fāqa se āh-o-bukā hai

kahīñ shikva-e-jaur-o-makr-o-daġhā hai

ġharaz har taraf se yahī bas sadā hai

jagah jī lagāne kī duniyā nahīñ hai

ye ’ibrat kī jā hai tamāsha nahīñ hai

jahan mein hain ’ibrat ke har su namune

magar tujh ko andha kiya rang-o-bu ne

kabhi ghaur se bhi dekha hai tu ne

jo ma’mur the wo mahal ab hain sune

jagah ji lagane ki duniya nahin hai

ye ’ibrat ki ja hai tamasha nahin hai

mile KHak mein ahl-e-shan kaise kaise

makin ho gae la-makan kaise kaise

hue namwar be-nishan kaise kaise

zamin kha gai naujawan kaise kaise

jagah ji lagane ki duniya nahin hai

ye ’ibrat ki ja hai tamasha nahin hai

zamin ke hue log paiwand kya kya

muluk-o-huzur-o-kHuda-wand kya kya

dikhaega tu zor ta-chand kya kya

ajal ne pachhaDe tanomand kya kya

jagah ji lagane ki duniya nahin hai

ye ’ibrat ki ja hai tamasha nahin hai

ajal ne na kisra hi chhoDa na dara

usi se sikandar sa fateh bhi haara

har ek le ke kya kya hasrat sudhaara

paDa rah gaya sab yahi ThaTh sara

jagah ji lagane ki duniya nahin hai

ye ’ibrat ki ja hai tamasha nahin hai

yahan har KHushi hai mubaddal ba-sad gham

jahan shadiyan thin wahin ab hain matam

ye sab har taraf inqilabaat-e-'alam

teri zat hi mein taghayyur mein har dam

jagah ji lagane ki duniya nahin hai

ye ’ibrat ki ja hai tamasha nahin hai

tujhe pahle bachpan mein barson khilaya

jawani ne phir tujh ko majnun banaya

buDhape ne phir aa ke kya kya sataya

ajal tera kar degi bilkul safaya

jagah ji lagane ki duniya nahin hai

ye ’ibrat ki ja hai tamasha nahin hai

yahi tujh ko dhun hai rahun sab se baala

ho zinat nirali ho fashion nirala

jiya karata hai kya yunhi marne wala

tujhe husn-e-zahir ne dhoke mein Dala

jagah ji lagane ki duniya nahin hai

ye ’ibrat ki ja hai tamasha nahin hai

wo hai ’aish-o-'ishrat ka koi mahal bhi

jahan tak mein har ghaDi ho ajal bhi

bas ab apne is jahl se tu nikal bhi

ye tarz-e-ma’ishat ab apna badal bhi

jagah ji lagane ki duniya nahin hai

ye ’ibrat ki ja hai tamasha nahin hai

ye duniya-e-fani hai mahbub tujh ko

hui wah kya chiz marghub tujh ko

nahin 'aql itni bhi 'majzub' tujh ko

samajh lena ab chahiye kHub tujh ko

jagah ji lagane ki duniya nahin hai

ye ’ibrat ki ja hai tamasha nahin hai

buDhape se pakar payam-e-qaza bhi

na chaunka na cheta na sambhla zara bhi

koi teri ghaflat ki hai intiha bhi

junun tabkai hosh mein apne aa bhi

jagah ji lagane ki duniya nahin hai

ye ’ibrat ki ja hai tamasha nahin hai

na dil-dada-e-she'r-goi rahega

na girwida shora-jui rahega

na koi raha hai na koi rahega

rahega to zikr-e-nikoi rahega

jagah ji lagane ki duniya nahin hai

ye ’ibrat ki ja hai tamasha nahin hai

jab us bazm se uTh gae dost aksar

aur uThte chale ja rahe hain barabar

ye har waqt pesh-e-nazar jab hai ye manzar

yahan par tera dil bahalta hai kyun kar

jagah ji lagane ki duniya nahin hai

ye ’ibrat ki ja hai tamasha nahin hai

jahan mein kahin shor-e-matam bapa hai

kahin fikr-o-faqa se aah-o-buka hai

kahin shikwa-e-jaur-o-makr-o-dagha hai

gharaz har taraf se yahi bas sada hai

jagah ji lagane ki duniya nahin hai

ye ’ibrat ki ja hai tamasha nahin hai