rahmatul-lilalamin

yā-rahmatal-lila.alamīn

ilhām jaama hai tirā

qur.āñ amāma hai tirā

mimbar tirā arsh-e-barīñ

yā-rahmatal-lila.alamīn

ā.īna-e-rahmat badan sāñseñ charāġh-e-ilm-o-fan

qurb-e-ilāhī terā ghar al-faqaro-faḳhrī terā dhan

ḳhushbū tirī jū-e-karam

āñkheñ tirī bāb-e-haram

nūr-e-azal tirī jabīñ

yā-rahmatal-lila.alamīn

terī ḳhamoshī bhī azaañ nīndeñ bhī terī rat-jage

terī hayāt-e-pāk kā har lamha paiġhambar lage

ḳhairul-bashar rutba tirā

āvāz-e-haq ḳhutba tirā

āfāq tere sāma.īñ

yā-rahmatal-lila.alamīn

qabza tirī parchhā.īñ kā bīnā.ī par idrāk par

pairoñ kī jumbish ḳhaak par aur āhaTeñ aflāk par

gard-e-safar tāroñ kī zau

markab burrāq-e-tez-rau

sā.īs jibrīl-e-amīñ

yā-rahmatal-lila.alamīn

tū āftāb-e-ġhār bhī tū parcham-e-yalġhār bhī

ijz-o-vafā bhī pyaar bhī shah-zor bhī sālār bhī

tirī zirah fat.h-o-zafar

sidq-o-safā tirī sipar

teġh-o-tabar sabr-o-yaqīñ

yā-rahmatal-lila.alamīn

phir gudḌiyoñ ko la.al de jaañ pattharoñ meñ Daal de

haavī hoñ mustaqbil pe ham maazī sā ham ko haal de

da.avā hai terī chaah kā

is ummat-e-gumrāh kā

tere sivā koī nahīñ

yā-rahmatal-lila.alamīn

ya-rahmatal-lilalamin

ilham jama hai tera

quran amama hai tera

mimbar tera arsh-e-barin

ya-rahmatal-lilalamin

aaina-e-rahmat badan sansen charagh-e-ilm-o-fan

qurb-e-ilahi tera ghar al-faqaro-faKHri tera dhan

KHushbu teri ju-e-karam

aankhen teri bab-e-haram

nur-e-azal teri jabin

ya-rahmatal-lilalamin

teri KHamoshi bhi azan ninden bhi teri rat-jage

teri hayat-e-pak ka har lamha paighambar lage

KHairul-bashar rutba tera

aawaz-e-haq KHutba tera

aafaq tere samain

ya-rahmatal-lilalamin

qabza teri parchhain ka binai par idrak par

pairon ki jumbish KHak par aur aahaTen aflak par

gard-e-safar taron ki zau

markab burraq-e-tez-rau

sais jibril-e-amin

ya-rahmatal-lilalamin

tu aaftab-e-ghaar bhi tu parcham-e-yalghaar bhi

ijz-o-wafa bhi pyar bhi shah-zor bhi salar bhi

teri zirah fath-o-zafar

sidq-o-safa teri sipar

tegh-o-tabar sabr-o-yaqin

ya-rahmatal-lilalamin

phir gudDiyon ko lal de jaan pattharon mein Dal de

hawi hon mustaqbil pe hum mazi sa hum ko haal de

dawa hai teri chah ka

is ummat-e-gumrah ka

tere siwa koi nahin

ya-rahmatal-lilalamin