shab-e-hasti kaTi hai mar mar ke

shab-e-hastī kaTī hai mar mar ke

sub.h aa.ī ḳhudā ḳhudā kar ke

ye mahallāt sañg-e-marmar ke

kyā muqābil haiñ dīda-e-tar ke

chashm-e-sāqī pe e'timād kiyā

so ga.e sāmne subū dhar ke

hashr ham ne kiyā ki tū ne bapā

kis ne chakme diye haiñ mahshar ke

tīrgī chhaT ga.ī magar 'vāsif'

mehmāñ haiñ ujāle dam-bhar ke

shab-e-hasti kaTi hai mar mar ke

subh aai KHuda KHuda kar ke

ye mahallat sang-e-marmar ke

kya muqabil hain dida-e-tar ke

chashm-e-saqi pe e'timad kiya

so gae samne subu dhar ke

hashr hum ne kiya ki tu ne bapa

kis ne chakme diye hain mahshar ke

tirgi chhaT gai magar 'wasif'

mehman hain ujale dam-bhar ke