yarab dil-e-muslim ko ek zinda tamanna de

yārab dil-e-muslim ko ik zinda tamannā de

jo qalb ko garmā de jo ruuh ko taḌpā de

phir vādī-e-fārāñ ke har zarre ko chamkā de

phir shauq-e-tamāshā de phir zauq-e-taqāzā de

mahrūm-e-tamāshā ko phir dīda-e-bianā de

dekhā hai jo kuchh maiñ ne auroñ ko bhī dikhlā de

bhaTke hue aahū ko phir sū-e-haram le chal

is shahar ke ḳhūgar ko phir vus.at-e-sahrā de

paidā dil-e-vīrāñ meñ phir shorish-e-mahshar kar

is mahmil-e-ḳhālī ko phir shāhid liilā de

is daur kī zulmat meñ har qalb-e-pareshāñ ko

vo dāġh-e-mohabbat de jo chāñd ko sharmā de

rif.at meñ maqāsid ko ham-dosh-e-surayyā kar

ḳhuddārī-e-sāhil de āzādī-e-dariyā de

be-laus mohabbat ho be-bāk sadāqat ho

sīnoñ meñ ujālā kar dil sūrat-e-mīnā de

ehsās-e-ināyat kar āsār-e-musībat kā

imroz kī shorish meñ andesha-e-fardā de

maiñ bulbul-e-nālāñ huuñ ik ujḌe gulistāñ kā

tāsīr kā saa.el huuñ muhtāj ko daatā de

yarab dil-e-muslim ko ek zinda tamanna de

jo qalb ko garma de jo ruh ko taDpa de

phir wadi-e-faran ke har zarre ko chamka de

phir shauq-e-tamasha de phir zauq-e-taqaza de

mahrum-e-tamasha ko phir dida-e-biana de

dekha hai jo kuchh main ne auron ko bhi dikhla de

bhaTke hue aahu ko phir su-e-haram le chal

is shahar ke KHugar ko phir wusat-e-sahra de

paida dil-e-viran mein phir shorish-e-mahshar kar

is mahmil-e-KHali ko phir shahid lila de

is daur ki zulmat mein har qalb-e-pareshan ko

wo dagh-e-mohabbat de jo chand ko sharma de

rifat mein maqasid ko ham-dosh-e-surayya kar

KHuddari-e-sahil de aazadi-e-dariya de

be-laus mohabbat ho be-bak sadaqat ho

sinon mein ujala kar dil surat-e-mina de

ehsas-e-inayat kar aasar-e-musibat ka

imroz ki shorish mein andesha-e-farda de

main bulbul-e-nalan hun ek ujDe gulistan ka

tasir ka sael hun muhtaj ko data de