चरन चलौ श्रीवृन्दावन मग जहँ मुनि अलि पिक कीर

चरन चलौ श्रीवृन्दावन मग जहँ मुनि अलि पिक कीर

कर तुम करौ करम कृष्णार्पण अहँकार तजि धीर

मस्तक नबियौ हरि-भक्तन को छाँड़ि कपट को चीर

श्रवन सदा सुनियौ हरि जसरस कथा भागवत हीर

नैना तरसि तरसि जल ढरियो पिय-मग जाय अधीर

नासा तब लौं स्वाँसा मारियौ सुरति राखि पिय तीर

रसना चखियो महाप्रसादै तजि विषया विष नीर

सुधि बुधि बढे प्रेम चरनन ज्यों तृष्णा बढे शरीर

चित्त चितेरे लिखिए पिय की मूरति हृदय-कुटीर

इन्द्रिय मन तन भजौ श्याम कों बढै बिरह की पीर

जुगलप्रिया आसा जिय धरियो मिलि हैं श्री बलबीर