سلام اے نورِ ذاتِ کبریا مولیٰ علی حیدر

سلام اے نورِ ذاتِ کبریا مولیٰ علی حیدر

سلام اے بادشاہِ لا فتیٰ، ہمرازِ پیغمبر

سلام اے نور بخشِ عالمِ امکاں، ضیائے کل

سلام اے افتخارِ عالمیں ہم پیشوائے کل

امامِ متقیں، یعسوبِ دیں، سالارِ جُندِ حق

حقیقت آشنا، حق بیں سراپا تم ہو عبدِ حق

بہارِ گلشنِ ہستی قدومِ پاک کا صدقہ

بٹا کرتا ہے تیرا اور شہِ لولاک کا صدقہ

سلام اے رہنمائے عاقلان و سوختانِ عشق

سلام اے نطقِ اعجازِ سخن، صاحبِ بیانِ عشق

ہزاروں آرزوئیں ہیں مگر اک آرزو یہ ہے

ہمہ اطراف ہو دیدار تیرا جستجو یہ ہے

نہیں مشکل کوئی تم کو مری یہ مشکل آسانی

مدد بہرِ خدا کیجے کہ ہوں وقفِ پریشانی

پئے زہرا، پئے سبطین، بہرِ مصطفیٰ سن لو

فقیرِ یادگارِ مبتلا کی التجا سن لو

مرا جینا مرا مرنا تری خاطر رہے مولیٰ

ترا صدقہ بٹے جب بھی گدا حاضر رہے مولیٰ