Awaz Shayari

saañs meñ āvāz-e-nai hai dil ġhazal-ḳhvāñ hai 'zhīn'

shāyad aane ko hai vo jān-e-bahārāñ is taraf

sans mein aawaz-e-nai hai dil ghazal-KHwan hai 'zhin'

shayad aane ko hai wo jaan-e-bahaaran is taraf

mere naale sun ke farmāte haiñ vo

ye usī kī dukh-bharī āvāz hai

mere nale sun ke farmate hain wo

ye usi ki dukh-bhari aawaz hai

chhup is tarah ki tirā aks bhī dikhā.ī na de

tirī sadā tirī āvāz bhī sunā.ī na de

chhup is tarah ki tera aks bhi dikhai na de

teri sada teri aawaz bhi sunai na de

sunā hai ham ne bahut kuchh kalīm ke muñh se

ham aa.eñ to hameñ āvāz hī sunā denā

suna hai hum ne bahut kuchh kalim ke munh se

hum aaen to hamein aawaz hi suna dena

paḌ gayā parda samā.at par tirī āvāz kā

ek aahaT kitne hañgāmoñ pe haavī ho ga.ī

paD gaya parda samaat par teri aawaz ka

ek aahaT kitne hangamon pe hawi ho gai

usī kā hai rañg yāsman meñ usī kī bū-bās nastaran meñ

jo khaḌke pattā bhī is chaman meñ ḳhayāl āvāz āshnā kar

usi ka hai rang yasman mein usi ki bu-bas nastaran mein

jo khaDke patta bhi is chaman mein KHayal aawaz aashna kar

ba-juz āvāz zanjīr-e-girāñ kuchh ḳhush nahīñ aatā

yahāñ tak bhar ga.e haiñ kaan āvāz-e-salāsil se

ba-juz aawaz zanjir-e-giran kuchh KHush nahin aata

yahan tak bhar gae hain kan aawaz-e-salasil se

kyuuñ mast-e-sharāb-e-aish-o-tarab taklīf-e-tavajjoh farmā.eñ

āvāz-e-shikast-e-dil hī to hai āvāz-e-shikast-e-jām nahīñ

kyun mast-e-sharab-e-aish-o-tarab taklif-e-tawajjoh farmaen

aawaz-e-shikast-e-dil hi to hai aawaz-e-shikast-e-jam nahin

sunā.ī jā.egī jab tak mujhe sazā-e-suḳhan

sukūt-e-vaqt meñ āvāz bhar chukā hūñgā

sunai jaegi jab tak mujhe saza-e-suKHan

sukut-e-waqt mein aawaz bhar chuka hunga

kabhī tanhā.ī-e-manzil se jo ghabrātā huuñ

un kī āvāz ye aatī hai ki maiñ aatā huuñ

kabhi tanhai-e-manzil se jo ghabraata hun

un ki aawaz ye aati hai ki main aata hun

roz-e-azal alast kā mazkūr ho chukā

sāheb-dilāñ kī kaan par āvāz hai hanūz

roz-e-azal alast ka mazkur ho chuka

saheb-dilan ki kan par aawaz hai hanuz

kuchh āvāzeñ aatī haiñ sunsān shab meñ

ab un se bhī ḳhālī bayābāñ hue haiñ

kuchh aawazen aati hain sunsan shab mein

ab un se bhi KHali bayaban hue hain

aap kī āvāz meñ hai dāvat-e-manzil kā raaz

kārvān-e-shauq kī bāñg-e-darā ho jā.iye

aap ki aawaz mein hai dawat-e-manzil ka raaz

karwan-e-shauq ki bang-e-dara ho jaiye

ye ro.ab hai chhāyā huā shām-e-shab-e-ġham kā

detā nahīñ āvāz bajāne se gajar bhī

ye roab hai chhaya hua sham-e-shab-e-gham ka

deta nahin aawaz bajaane se gajar bhi

bazm-e-ḳhalvat meñ agar chhup ke hayā aane lagī

baḌh ke āvāz dī shoḳhī ne ki bāhar bāhar

bazm-e-KHalwat mein agar chhup ke haya aane lagi

baDh ke aawaz di shoKHi ne ki bahar bahar

vo bhī 'sādiq' gosh-bar-āvāz haiñ

ab merī āvāz kuchh hai to sahī

wo bhi 'sadiq' gosh-bar-awaz hain

ab meri aawaz kuchh hai to sahi

chheḌ kar aazmā liyā ham ne

terī āvāz taar se niklī

chheD kar aazma liya hum ne

teri aawaz tar se nikli

kyuuñ ai dil-e-muztar hue kyā vo tire naale

ai sāz-e-shikasta tirī āvāz kahāñ hai

kyun ai dil-e-muztar hue kya wo tere nale

ai saz-e-shikasta teri aawaz kahan hai

patthar mujhe sharminda-e-guftār na kar de

ūñchā mirī āvāz ko dīvār na kar de

patthar mujhe sharminda-e-guftar na kar de

uncha meri aawaz ko diwar na kar de

DhūñDne niklā thā āvāzoñ kī bastī meñ use

soch kar vīrāñ guzargāhoñ pe baiThā rah gayā

DhunDne nikla tha aawazon ki basti mein use

soch kar viran guzargahon pe baiTha rah gaya

duur jā kar mirī āvāz sunī duniyā ne

fan ujāgar mirā ā.īna-e-fardā se huā

dur ja kar meri aawaz suni duniya ne

fan ujagar mera aaina-e-farda se hua

har ik jism meñ hai vahī bas ḳhamosh

har āvāz meñ boltā hai vahī

har ek jism mein hai wahi bas KHamosh

har aawaz mein bolta hai wahi

Duub kar dekh samundar huuñ maiñ āvāzoñ kā

tālib-e-husn-e-samā.at mirā sannāTā hai

Dub kar dekh samundar hun main aawazon ka

talib-e-husn-e-samaat mera sannaTa hai

jahāñ āvāz nā-mahram kā aave

vo tauba kar vahāñ suuñ aTlī jaave

jahan aawaz na-mahram ka aawe

wo tauba kar wahan sun aTli jawe