।। बरवै नायिका-भेद ।।

।। दोहा ।।

कबित कह्यो दोहा कह्यो, तुल्यो न छप्पय छंद ।

बिरच्यो यहै विचारि कै, यह बरवै रस-कंद ।।1।।

।। बन्दना ।।

बन्दौं देवि सरदवा, पद कर जोरि ।

वरनौं काव्य बरैवा, लगइ न खोरि ।।2।।

।। त्रिविध स्वकीयां ।।

।। मुग्धा ।।

लहरत लहर लहरिया, लहर बहार ।

मोतिन जरी किनरिया, बिथुरे बार ।।3।।

लागौ आनि नबेलिअहि, मनसिज बान ।

उकसन लागु उरोजवा, दिगै तिरछान ।।4।।

।। मध्या ।।

निसुदिन चाहन चाहत, श्री व्रजराय ।

लाज जोरावरि है, बसि करत अकाज ।।5।।

रहत नैन के कोरवा, चितवनि छाय ।

चलत न पगु पैजनिआँ, मगु ठहराय ।।6।।

।। प्रौढ़ा ।।

भोरहि बोलि कोइलिआ, बढ़वति ताप ।

घरी एक घरि अलिपा, रहु चुपचार ।।7।।

।। मुग्धा भेद ।।

।। अज्ञात ।।

कौन रोग दौ छतिआ, उकस्यो आइ ।

दुखि-दुखि उठत करेजवा, लगि जनु लाइ ।।8।।

।। ज्ञात ।।

औचक आइ जोबनवा, मोहि दुख दीन्ह ।

छुटिगो संग गोइअवाँ, नहिं भल कीन्ह ।।9।।

।। नवोढ़ा ।।

पहिरत चूनि चुनरिया, भूषन भाव ।

नैनन्हि देत कजरवा, फूलनि-चाव ।।10।।

।। विस्रब्ध-नवोढ़ा ।।

जघन जोरति गोरिआ, करति कठोर ।

छुअन न पावै पिअवा, कहुँ कुच-कोर ।।11।।

।। द्दिविध-परकीया ।।

।। ऊढ़ा ।।

सुनि धुनि कान मुरलिआ, रागन-भेद ।

गै मन छाँड़त गोरिआ, गनत न खेद ।।12।।

निसुदिन सासु ननँदिआ, मोहिं घर घेरु ।

सुनन न देत मुरलिआ, ना धुन टेरु ।।13।।

।। अनूढ़ा ।।

मोहिं बर जोग कन्हैऔ, लागउँ पाँय ।

तुमको पुजउँ देवतवा, होहु सहाय ।।14।।

।। परकीया (ऊढ़ा) के 6 भेद ।।

।। भूत-गुप्त ।।

चूनत फूल गुलबवा, डार कटील ।

टुटिगौ बन्द अँगिअवा, फटु पट नील ।।15।।

अब नहिं तोहिं पढावों, सुगना सार ।

परिगो दाग अधरवा, चोंच तुचार ।।16।।

।। भविष्य-गुप्त ।।

होइ कत कारि बदरिआ, बरखत पाथ ।

जै हौं, घन अमरइआ, संग न साथ ।।17।।

जै हौ चुनन कुसुमिआ, खेत बड़ि दूरि ।

चेरिया केरि छोकरिआ, मोहिं सँग करि।।18।।

।। वचन-विदग्धा ।।

तोरेसि नाक नथुनिआ, मित हित नीक ।

कहेसि नाक पहिरावहु, चित दै सींक ।।19।।

।। क्रिया-विदग्धा ।।

बाहर लै कै दिअवा, बारन जाइ ।

सासु-ननँद घर पहुँचत, देत बुताइ ।।20।।

।। लक्षित ।।

आजु नैन के कोरवा, औरै भाँति ।

नागर नेह नवेलिहि, मूँदि न जाति ।।21।।

।। मुदिता ।।

जै हौं कान्ह नेवतवा, भो दुख दून ।

बहू करै रखवरिआ, है घर सून ।।22।।

नेवते गई ननँदिआ, मैके सास ।

दुलहिनि तोरि खबरिआ, औ पिअ पास ।।23।।

।। कुलटा ।।

जस मदभातल हथिआ, हुमकति जाय ।

चितवत छैलव तरुनिआ, मुह मुसुकाय ।।24।।

चितवत ऊँचि अटरिआ, दाहिन बाम ।

लाखन लखत बिदेसिआ, ह्रै बस काम ।।25।।

।। प्रथम अनुसयना ।।

जमुना-तीर तरुनिअहि, लखि भौ सूल ।

झरिगो कुंज-बेअलिआ, फूलत फूल ।।26।।

ग्रीषम दहत दवरिआ, कुञ्ज-कुटीर ।

तिमि-तिमि तकत तरुनि अहि, बाढ़त पीर ।।27।।

।। द्वितीय अनुसयना ।।

धीरज धरू किन गोरिआ, करि अनुराग ।

जात जहाँ पिअ देसवा, घन बर बाग ।।28।।

जनि मरु रोइ दुलहिआ, करि मन ऊँन ।

सघन कुंज ससुररिआ, औ घर सून ।।29।।

।। तृतीय अनुसयना ।।

मितवा करनि पसुरिआ, सुमन सपात ।

फिरि-फिरि ताकि तरुनिआ, मन पछितात ।।30।।

मित उतते फिरि आओ, देखि अराम ।

मैं न गई अमरैआ, रह्यो न काम ।।31।।

।। गणिका ।।

लखि लखि धनिक नयकवा, बनवति भेख ।

रहि गइ हेरि अरसिआ, कजरा रेख ।।32।।

।। अन्य सम्भोग दुःखिता ।।

मैं पठई जेहि कजवा, आइस साधि ।

छुटिगो सीस जुरववा, दिढ़ करि बाँधि ।।33।।

सखि इत हरबर आवत, भो पथ खेद ।

रहि-रहि लेत उससवा, औ तन सेद ।।34।।

।। रूप-गर्विता ।।

छीन, मलिन, विष-भइआ, औगुन तीन ।

मोहिं कह चन्द-बदनिआ, पिय मति हीन ।।35।।

रातुल भयसि मुगतआ, निरस पखान ।

यह मधु-भरल अधरवा, करसि समान ।।36।।

।। प्रेम-गर्वित ।।

आपुहि देत कजरवा, गूँदत हार ।

चुनि पहिराव चुनरिआ, प्रान-अधार ।।37।।

औरन पाँय जवकवा, नाहन दीन ।

तुम्हैं अँगोरत गोरिआ, न्हान न कीन ।।38।।

।। नायिकावों के और दस भेद ।।

।। (1) प्रोषितपतिका ।।

।। मुग्धा-प्रोषिपतिका ।।

तै अब जासि बेइलिआ, जरि-बरि मूल ।

बिनु पिय सूल करेजवा, लखि तुव फूल ।।39।।

।। मध्या-प्रोषितपतिका ।।

का तुव मंजु लतिअवा, झलति जाय ।

पिअ बिन मन हुड़कइया, मोहिं न सुहाय ।।40।।

।। प्रौढ़ा-प्रोषितपतिका ।।

कासन कहउँ सँदेसवा, पिअ परदेसु ।

लागेउ जइत न फूले, तेहि बन टेसु ।।41।।

।। (2) खण्डित ।।

।। मुग्धा-खण्डित ।।

सखि-सिख सीखि नबेलिआ, कीन्हेसि मान ।

पिय लखि कोप भवनवाँ, ठानेसि ठान ।।42।।

सीस नवाइ नबेलिया, निचवा जोइ ।

छिति खनि छोर छिगुनिआ, ससुकन रोइ ।।43।।

।। मध्या-खण्डिता ।।

ठगि गो पीअ पलँगिआ, आलस पाइ ।

पौढ़हु जाइ बरोठवा, सेज बिछाइ ।।44।।

पोछेहु अनख कजरवा, जावक भाल ।

उपटेउ पीतम छतिया, बिन गुन माल ।।45।।

।। प्रौढ़ा-खण्डिता ।।

पिय आवत अगनइआ, उठि कै लीन्ह ।

बिहसत चतुर तिरिअवा, बैठन दीन्ह ।।46।।

।। परकीया-खण्डिता ।।

जेहि लगि सजन सनेहिया, छुट घर बार ।

अपने होत पिअरवा, साँच परार ।।47।।

पौढ़हु पीअ पलँगिआ, मींजउँ पाय ।

रैनि जगे कर निंदिआ, सब मिटि जाय ।।48।।

।। गणिका-खण्डिता ।।

मितवा ओठ कजरवा, जावक भाल ।

लिहेसि काढ़ि बरिअइआ, तकि मनिमाल ।।49।।

।। (3) कलहान्तरिता ।।

।। मुग्धा-कलहान्तरिता ।।

आयहु अबहिं गवनवाँ, तुरतहि मान ।

अब रस लागि गोरिअवा, मन पछितान ।।50।।

।। मध्या-कलहान्तरिता ।।

मैं मति मन्द तिरिअवा, परलेउ भोरि ।

ते नहिं कन्त मनवलेउँ, तोहिं कछु खोरि ।।51।।

।। प्रौढ़ा-कलहान्तरिता ।।

थकि गौ करि मनुहरिआ, फिरि गौ पीव ।

मैं उठि तुरत न लायउँ, हिमकर हीव ।।52।।

।। परकीया-कलहान्तरिता ।।

जेहि लगि कीन बिरोगवा, ननद जेठानि ।

लीन न लाइ करेजवा, तेहि हित जानि ।।53।।

।। गणिका-कलहान्तरिता ।।

जेहि दीन्हे बहु बेरिया, मोहिं मनि-माल ।

तेहते रूठेउँ सखिआ, फिरि गौ लाल ।।54।।

।। (4) बिमलब्धा ।।

।। मुग्धा-बिप्रलब्धा ।।

मिलेउ न कन्त सहेटवा, लखेउ डेराइ ।

धनिआ कमल बदनिआ, गौ कुभिलाइ ।।55।।

।। मध्या-बिप्रलब्धा ।।

लखेसि न केलि-भवनवाँ, नन्द कुमार ।

लै-लै ऊँवि उससवा, ह्वइ बिकरार ।।56।।

।। प्रौढ़ा-बिप्रलब्धा ।।

देखि न कन्त सहेटवा, भो दुख पूरि ।

रोवत नैन कजरवा, ह्वै गौ दूरि।।।57।।

।। परकीया-बिप्रलब्धा ।।

बैरिनि मह अभिसरवा, अति दुखदानि ।

तापर मिल्यो न मितवा, भो पछितानी ।।58।।

।। गणिका-बिप्रलब्धा ।।

करिकै सोहर सिंगरवा, अतर लगाइ ।

मिलेउ न लाल सहेटवा, फिरि पछिताइ ।।59।।

।। (5) उत्कण्ठिता ।।

।। मुग्धा-उत्कण्ठिता ।।

गौ जुग जाम जमिनिआ, पिय नहिं आइ ।

राखेहु कौन सवतिआ, धौं बिलमाइ ।।60।।

।। मध्या-उत्कण्ठिता ।।

जोहत परी पलँगिआ, पिय कै बाट ।

बेचेउ चतुर तिरिअवा, धौं केहि हाट ।।61।।

।। प्रौढ़ा-उत्कण्ठिता ।।

पिय-पथ हेरति गोरिआ, भो भिनुसार ।

चलहु न करिहि तिरिअवा, तुव इतबार ।।62।।

।। परकीया-उत्कण्ठिता ।।

उठि-उठि जात खिरकिआ, जोहन बाट ।

कत वह आइहि मितवा, सूनी खाट ।।63।।

।। गणिका-उत्खण्ठिता ।।

कढ़ि न नींद भिनुसरवा, आलस पाइ ।

धन दै मूरूख मितवा, रहत लोभाइ ।।64।।

।। (6) बासकसज्जा ।।

।। मुग्धा-बासकसज्जा ।।

हरुए गवन नबेलिआ, डीठि बचाइ ।

पौढ़ी जाइ पलँगिआ, सेज बिछाइ ।।65।।

।। मध्या-बासकसज्जा ।।

सेज बिछाइ पलँगिआ, अंग सिंगार ।

चितवत चौंकि तरुनिआ, दै दिग-द्वार ।।66।।

।। प्रौढ़ा-बासकसज्जा ।।

हँसि-हँसि हेरि अरसिआ, सहज सिंगार ।

उतरत चढ़त नबेलिआ, पियकै बार ।।67।।

।। परकीया-बासकसज्जा ।।

सोवत सब गुरु लोगवा, जानेउ बाल ।

दीन्हेसि खोलि खिरकिआ, उठिकै हाल ।।68।।

।। गणिका-बासकसज्जा ।।

कीन्हेसि सबै सिंगरवा, चातुर बाल ।

ऐहै प्रान पियरवा, लै मनि-माल ।।69।।

।। (7) स्वाधीनपतिका ।।

।। मुग्धा-स्वाधीनपतिका ।।

आपुहिं देत जवकवा, गहि-गहि पाँइ ।

आपु देत मोहि पिअवा, पान खवाइ ।।70।।

।। मध्या-स्वाधीनपतिका ।।

पीतम करत पिअरवा, कहल न जात ।

रहत गढ़ावत सोनवा, यहै सिरात ।।71।।

।। प्रौढ़ा-स्वाधीनपतिका ।।

मैं अरु मोर पिअरवा, जस जल-मीन ।

बिछुरत तजत परनवाँ, रहत अधीन ।।72।।

।। परकीया-स्वाधीनपतिका ।।

भौ जुग नयन चकोरवा, पिअ मुख चन्द ।

जानति है तिअ अपने, मोहि सुख-कन्द ।।73।।

।। गणिका-स्वाधीनपतिका ।।

लै हीरन के हरवा, मोतिका माल ।

मोहि रहत पहिरावत, बसि ह्वै लाल ।।74।।

।। (8) अभिसारिका ।।

।। मुग्धा-अभिसारिका ।।

चलीं लवाइ नबेलिअहि, सखि सब संग ।

जस हुलसत गो गोदवा, मत्त मतंग ।।75।।

।। मध्या-अभिसारिका ।।

पहिरे लाल अछुअवा, तिअ मज-पाय ।

चढ़िकै नेह-हथियवा, हुलसत जाय ।।76।।

।। प्रौढ़ा-अभिसारिका ।।

चली रइनि अधिअरिआ, साहस गाढ़ि ।

पाँयन केरि ककरिआ, डारेसि काढ़ि ।।77।।

।। परकीया-कृष्णाभिसारिका ।।

नील मनिन के हरवा, नील सिंगार ।

किए रइनि अधिअरिआ, धनि अभिसार ।।78।।

।। परकीया-शुल्काभिसारिका ।।

सेत कुसुम के हरवा, भूषन सेत ।

चली रैनि उजिअरिआ, पिअ के हेत ।।79।।

।। दिवा-अभिसारिका ।।

पहिरि बसन जहितरिआ, पिअ के हेत ।

चली जेठ दुपहरिया, मिलि रवि जोति ।।80।।

।। गणिका-अभिसारिका ।।

धन-हित कीन्ह सिंगरवा चातुर बाल ।

चली संग लै चेरिआ, जहँवा लाल ।।81।।

।। (9) प्रवत्स्यत्प्रेयसी ।।

।। मुग्धा-प्रवत्स्यत्प्रेयसी ।।

परिगौ कानन सखिआ, पिअ को गौन ।

बैठी कनन पलँगिआ, होइकै मौन ।।82।।

।। मध्या-प्रवत्स्यत्प्रेयसी ।।

सुठि सुकुमार तरुनिआ, सुनि पिअ गौन ।

लाजनि पौढ़ि ओबरिआ, ह्वै कै मौन ।।83।।

।। प्रौढ़ा-प्रवत्स्यत्प्रेयसी ।।

बन घन फूलि टेसुइआ, बगियन बेलि ।

तब पिअ चलेउ बिदेसवा, फागुन फैलि ।।84।।

।। परकीया-प्रवत्स्यत्प्रेयसी ।।

मितवा चलेउ बिदेसवा, मन अनुरागि ।

पिअ की सुरति गगरिया, रहि मग लागि ।।85।।

।। गणिका-प्रवत्स्यत्प्रेयसी ।।

पीतम एक सुमिरिनिआ, मोंहि दै जाहु ।

जेहिं जपि तोर बिरहवा, करब निबाहु ।।86।।

।। (10) आगतपतिका ।।

बहुत दिना पर पिअवा, आयउ आजु ।

पुलकित नवल बधुइआ, कर घर-काजु ।।87।।

।। मध्या-आगतपतिका ।।

पिअवा पौरि दुअरवा, उठि किन देखु ।

दुरलभ पाइ बिदेसिआ, जिअकै लैखु ।। 88।।

।। प्रौढ़ा-आगपतिका ।।

योबन प्रान पिअरवा, हेरेउ आइ ।

तलफत मीन तिरिअवा, जस जल पाइ ।।89।।

।। परकीया-आगपतिका ।।

पूछत चली खबरिया, मितवा तीर ।

नैहर खोज तिरिअवा, पहिरि सुचीर ।।90।।

।। गणिका-आगतपतिका ।।

तौं लगि मिटै न मितवा, तनकी पीर ।

जौं लगि पहिरि न छतिआ, नख-नग-चीर ।।91।।

।। पुनः त्रिविध नायिका-भेद ।।

।। उत्तम ।।

लखि अपराध नयकवा, नहिं रिस कीन्ह ।

बिहँसत चँदन-चउकिया, बैठन दीन ।।92।।

।। मध्यमा ।।

बिन गुन पिअ उर हरवा, उपटेउ हेरि ।

चुप ह्वै चित्र-पुतरिया, रहि चख फेरि ।।93।।

।। अधमा ।।

बार-बार गुरु मनवा, जनि करु नारि ।

मानिक औ गजमोतिआ, जौं लगि बारि ।।94।।

।। सखि के काम ।।

।। मण्डन ।।

सखिअन कीन सिंगरवा, रचि बहु भाँति ।

हेरति नैन अरसिआ, मुख मुसकाति ।।95।।

।। शिक्षा ।।

थके बैठि गोड़वरिआ, मींजहु पाँउ ।

पिअ तन पेखि गरमिया, बिजन डोलाउ ।।96।।

।। उपलंभ ।।

चुप रह्यौ सँदेसवा, सुनि मुसुकाय ।

पिअ निज हाथ बिरवना, दीन पठाय ।।97।।

।। परिहास ।।

बिहँसत भौंह चढ़ाए, धनुष मनोज ।

लावत उर अबलनिआँ, ऐंठि उरोज ।।98।।

।। दर्शन ।।

।। साक्षात-दर्शन ।।

बिरहिनि और बिदेसिआ, भौ एक ठौर ।

पिअ मुख तकत तिरिअवा, चन्द चकोर ।।99।।

।। चित्र-दर्शन ।।

पिअ मूरति चित-सरिया, देखत बाल ।

बितवत अवधि बसरवा, जपि-जपि माल ।।100।।

।। अवण-दर्शन ।।

आयउ मीत बिदेसिआ, सुनु सखि तोर ।

उठि किन करसि सिगँरवा, सुनि सिख मोर ।।101।।

।। स्वप्न-दर्शन ।।

पीतम मिलेउ सपनवाँ, भौ सुख-खानि ।

आनि जगायसि चेरिआ, भइ दुख-दानि ।।102।।

।। नायक ।।

।। लक्षण ।।

सुन्दर चतुर धनिकवा, कुल को ऊँच ।

केलि-कला परबिनवा, सील समूच ।।103।।

पति उपपति बैसिकवा, त्रिबिध बखानि ।

विधि सों ब्याह्यो मुरुजन, पति सो जानि ।।104।।

।। पति ।।

लैकै सुघर पुरुषवा, पिअ के साथ ।

छपरो एक छतरिआ, बरखत पाथ ।।105।।

।। उपपति ।।

झाँकि झरोखे गोरिआ, आँखिन जोर ।

फिरि चितवति चित मितवा, करत निहोर ।।106।।

।। बैसिक ।।

जनु अति नील अलकिया, बनसी लाय ।

मो मन बार बधुअवा, मीन बझाय ।।107।।

।। चतुर्विध-पति ।।

।। अनुकूल ।।

करत नही अपरधवा, सपनेहुँ पीव ।

मान करै को सधवा, रहिगौ जीव ।।108।।

।। दक्षिण ।।

सब मिलि करैं निहोरवा, हम कहँ देइ ।

गुहि-गुहि चम्पक टँड़िआ, उचइ सो लेइ ।।109।।

।। धृष्ट ।।

जहवाँ जगे रइनिआँ, तहवाँ जाउ ।

जोरि नयन निरलजवा, कत मुसकाउ ।।110।।

।। शठ ।।

छूटयो लाज गरिअवा, औ कुल-कानि ।

करत रोज अपरधवा, परि गइ बानि ।।111।।

।। पुनः चतुर्विध नायक ।।

।। क्रिया-चतुर नायक ।।

खेलत जानिसि टोलिआ, नन्द किसोर ।

छुइ बृषभानु-कुँअरिआ, होइगो चोर ।।112।।

।। वचन-चतुर नायक ।।

सघन कुँज अमरैआ, सीतल छाँहि ।

झगरति आइ कोइलिआ, फिरि उड़ि जाहि ।।113।।

।। मानी-नायक ।।

अब न जनम भरि सखिआ, ताकौं ओहि ।

ऐंठत गो अभिमनवा, तजि कै मोहि ।।114।।

प्रोषित-नायक ।।

करिबै ऊँचि अटरिआ, तिअ सँग केलि ।

कबधौं पहिरि गजरवा, हार चमेलि ।।115।।

।। इति बरवै नायिका-भेद समाप्त ।।