risala man-mohan

ek jogī apas ke jog sañg

nā auroñ sā dev bhog ke sañg

mil piv se paak apne ghar meñ

islām bhī kufr le ke har meñ

rahtā thā sadā alak nirañkār

nā piir apas ke kufr ke Thaar

nā aur tarīq meñ rakhe paañv

nā jaan sivā kahīñ use Thāñv

chand roz thā is faqīr sañg

do-rañgī ko chhoḌ ho ke yak sañg

ek roz kā ittifāq aisā

jañgal meñ Thanā thā shab baserā

dono hī thake hue qadam ke

Thas khaa.e hue apas ke dam ke

us dasht meñ saarī raat baare

kuchh jāgte sote shab guzāre

par jogī yoñ hī rahā thā baiThā

apas ke thā piv man meñ baiThā

jab raat akhanD dopahar huī

tab mujh meñ ye baat kī guzar huī

yuuñ pūchh uThā ai pyāre jogī

ai jaan ke man-mohan ke bhogī

kis haal meñ ho ḳhāmosh baiThe

kis baat ke aap haiñ ke dar pai

sunte hī ye baat sar uchāyā

ye bol mere ko kah sunāyā

gurū maiñ ajab ḳhayāl meñ thā

yuuñ jaan se ḳhīl-o-ḳhāl meñ thā

ai jaan tū kaun hai mujhe kah

yā ḳhaak hai pavan hai mujhe kah

yā aag hai or yā hai paanī

batlā de mere ko tujh nishānī

kis shakl meñ kis libās meñ hai

yā dhartī meñ yā akāsh meñ hai

paidā kiyā kaun hai tere ko

jo bhed terā hai kah mere ko

jab mujh ko diyā javāb yo jiiv

maiñ jiiv huuñ bha.ī har-ek kā piiv

maiñ vo huuñ ke aap hī aap meñ huuñ

firā.ūn sā maiñ ye maiñ nahīñ huuñ

nā ḳhaak huuñ baad huuñ na paanī

nā aag huuñ nā koī nishānī

nā kis ne kiyā mere kuuñ paidā

maiñ aap se aap huuñ huvaidā

hai bhed merā mere meñ māmūr

na kis ko ye bhed paane ma.azūr

kul chitr ke maiñ libās meñ huuñ

har phuul meñ phuul baas meñ huuñ

nāpākī maiñ nahīñ paakī maiñ huuñ

nūr-e-man bhī maiñ huuñ ḳhākī maiñ huuñ

ye kaun sivā mere haiñ ḳhālī

hai donoñ-jahāñ muj haat thālī

har jism ko jiiv hai yahī jiiv

ushshāq ko piiv hai yahī jiiv

al-qissa ye bāteñ hote hote

ham donoñ duī ko khote khote

itne meñ ḳhurūs baag hāñkā

sādiq kā shafaq falak pe phāñkā

paḌh salāt-o-farz ko guzar ke

raahī hue apne rah-guzar ke

ek jogi apas ke jog sang

na auron sa dew bhog ke sang

mil piw se pak apne ghar mein

islam bhi kufr le ke har mein

rahta tha sada alak nirankar

na pir apas ke kufr ke Thaar

na aur tariq mein rakhe panw

na jaan siwa kahin use Thanw

chand roz tha is faqir sang

do-rangi ko chhoD ho ke yak sang

ek roz ka ittifaq aisa

jangal mein Thana tha shab basera

dono hi thake hue qadam ke

Thas khae hue apas ke dam ke

us dasht mein sari raat bare

kuchh jagte sote shab guzare

par jogi yon hi raha tha baiTha

apas ke tha piw man mein baiTha

jab raat akhanD dopahar hui

tab mujh mein ye baat ki guzar hui

yun puchh uTha ai pyare jogi

ai jaan ke man-mohan ke bhogi

kis haal mein ho KHamosh baiThe

kis baat ke aap hain ke dar pai

sunte hi ye baat sar uchaya

ye bol mere ko kah sunaya

guru main ajab KHayal mein tha

yun jaan se KHil-o-KHal mein tha

ai jaan tu kaun hai mujhe kah

ya KHak hai pawan hai mujhe kah

ya aag hai or ya hai pani

batla de mere ko tujh nishani

kis shakl mein kis libas mein hai

ya dharti mein ya akash mein hai

paida kiya kaun hai tere ko

jo bhed tera hai kah mere ko

jab mujh ko diya jawab yo jiw

main jiw hun bhai har-ek ka piw

main wo hun ke aap hi aap mein hun

firaun sa main ye main nahin hun

na KHak hun baad hun na pani

na aag hun na koi nishani

na kis ne kiya mere kun paida

main aap se aap hun huwaida

hai bhed mera mere mein mamur

na kis ko ye bhed pane mazur

kul chitr ke main libas mein hun

har phul mein phul bas mein hun

napaki main nahin paki main hun

nur-e-man bhi main hun KHaki main hun

ye kaun siwa mere hain KHali

hai donon-jahan muj hat thaali

har jism ko jiw hai yahi jiw

ushshaq ko piw hai yahi jiw

al-qissa ye baaten hote hote

hum donon dui ko khote khote

itne mein KHurus bag hanka

sadiq ka shafaq falak pe phanka

paDh salat-o-farz ko guzar ke

rahi hue apne rah-guzar ke