aa ki hasti be-lab-o-be-gosh hai terai baghair

aa ki hastī be-lab-o-be-gosh hai terai baġhair

kā.enāt ik mahshar-e-ḳhāmosh hai tere baġhair

tū nahīñ to raat hai mahrūm-e-soz-e-zindagī

shaam hī se chāñdnī rū-posh hai tere baġhair

ai ki tere husn meñ raqsāñ haiñ lākhoñ mai-kade

tishna-e-bāda-lab-e-mai-nosh hai tere baġhair

aa ki phir dil meñ nahīñ uThtī koī mauj-e-nishāt

sard paanī bāda-e-sar-josh hai tere baġhair

niiñd aa aa kar uchaT jaatī hai terī yaad meñ

tār-e-bistar nashtar-e-āġhosh hai tere baġhair

jalva-e-har-roz jo har sub.h kī qismat meñ thā

ab vo ik dhuñdlā sā ḳhvāb-e-dosh hai tere baġhair

zindagī tujh se ibārat thī magar jab tū nahīñ

zindagī kā apnī kis ko hosh hai tere baġhair

zahmat-e-takiya tire zaanū ko detā hai ḳhayāl

sar ba-har pahlū vabāl-e-dosh hai tere baġhair

baiTh kar būñdoñ meñ kis ke saath dekhūñgā bahār

abr kī aamad vidā-e-hosh hai tere baġhair

aa ki mauzū-e-ġhazal ko DhūñDhtī hai har nigāh

naġhma-e-mutrib balā-e-gosh hai tere baġhair

kyā ḳhabar 'sīmāb' kab ghabrā ke de de apnī jaan

zabt go ab tak tahammul-kosh hai tere baġhair

aa ki hasti be-lab-o-be-gosh hai terai baghair

kaenat ek mahshar-e-KHamosh hai tere baghair

tu nahin to raat hai mahrum-e-soz-e-zindagi

sham hi se chandni ru-posh hai tere baghair

ai ki tere husn mein raqsan hain lakhon mai-kade

tishna-e-baada-lab-e-mai-nosh hai tere baghair

aa ki phir dil mein nahin uThti koi mauj-e-nishat

sard pani baada-e-sar-josh hai tere baghair

nind aa aa kar uchaT jati hai teri yaad mein

tar-e-bistar nashtar-e-aghosh hai tere baghair

jalwa-e-har-roz jo har subh ki qismat mein tha

ab wo ek dhundla sa KHwab-e-dosh hai tere baghair

zindagi tujh se ibarat thi magar jab tu nahin

zindagi ka apnī kis ko hosh hai tere baghair

zahmat-e-takiya tere zanu ko deta hai KHayal

sar ba-har pahlu wabaal-e-dosh hai tere baghair

baiTh kar bundon mein kis ke sath dekhunga bahaar

abr ki aamad wida-e-hosh hai tere baghair

aa ki mauzu-e-ghazal ko DhunDhti hai har nigah

naghma-e-mutrib bala-e-gosh hai tere baghair

kya KHabar 'simab' kab ghabra ke de de apnī jaan

zabt go ab tak tahammul-kosh hai tere baghair