aadmi chaunk chuka hai magar uTTha to nahin

aadmī chauñk chukā hai magar uTThā to nahīñ

maiñ jise DhūñDh rahā huuñ ye vo duniyā to nahīñ

ruuh ko dard milā dard ko āñkheñ na milīñ

tujh ko mahsūs kiyā hai tujhe dekhā to nahīñ

rañg sī shakl milī hai tujhe ḳhushbū sā mizāj

lāla-o-gul kahīñ terā hī sarāpā to nahīñ

chehra dekhūñ to ḳhad-o-ḳhāl badal jaate hī

chhup ke ā.īne ke pīchhe koī baiThā to nahīñ

pheñk kar maar zamīñ par na zamāne mujh ko

TuuT hī jā.ūñgā jaise maiñ khilaunā to nahīñ

zindagī tujh se har ik saañs pe samjhautā karūñ

shauq jiine kā hai mujh ko magar itnā to nahīñ

merī āñkhoñ meñ tire naqsh-e-qadam kaise haiñ

is sarā.e meñ musāfir koī Thahrā to nahīñ

sochte sochte dil Dūbne lagtā hai mirā

zehn kī tah meñ 'muzaffar' koī dariyā to nahīñ

aadmi chaunk chuka hai magar uTTha to nahin

main jise DhunDh raha hun ye wo duniya to nahin

ruh ko dard mila dard ko aankhen na milin

tujh ko mahsus kiya hai tujhe dekha to nahin

rang si shakl mili hai tujhe KHushbu sa mizaj

lala-o-gul kahin tera hi sarapa to nahin

chehra dekhun to KHad-o-KHal badal jate hi

chhup ke aaine ke pichhe koi baiTha to nahin

phenk kar mar zamin par na zamane mujh ko

TuT hi jaunga jaise main khilauna to nahin

zindagi tujh se har ek sans pe samjhauta karun

shauq jine ka hai mujh ko magar itna to nahin

meri aankhon mein tere naqsh-e-qadam kaise hain

is sarae mein musafir koi Thahra to nahin

sochte sochte dil Dubne lagta hai mera

zehn ki tah mein 'muzaffar' koi dariya to nahin