aag se sairab dasht-e-zindagani ho gaya

aag se sairāb dasht-e-zindagānī ho gayā

sho.ala-e-dil aañkh meñ aayā to paanī ho gayā

dard siine meñ uThā māthe pe shikneñ paḌ ga.iiñ

rañg chehre kā sadā-e-be-zabānī ho gayā

terī āñkheñ aa.ina hāthoñ meñ le kar aa ga.iiñ

rū-ba-rū ho kar tire maiñ apnā saanī ho gayā

jab bhaḌak uTThā thā tere qurb se merā badan

naam un hassās lamhoñ kā javānī ho gayā

kar diyā thā maiñ ne jo āvāra pattoñ par raqam

raaz vo rusvā havāoñ kī zabānī ho gayā

ek an-miT raushnī thā arsh kī mehrāb par

aadmī ke ruup meñ aa kar maiñ faanī ho gayā

jin ke sīnoñ meñ dhaḌaktā thā 'muzaffar' merā dil

aaj maiñ un ke liye bhūlī kahānī ho gayā

aag se sairab dasht-e-zindagani ho gaya

shoala-e-dil aankh mein aaya to pani ho gaya

dard sine mein uTha mathe pe shiknen paD gain

rang chehre ka sada-e-be-zabani ho gaya

teri aankhen aaina hathon mein le kar aa gain

ru-ba-ru ho kar tere main apna sani ho gaya

jab bhaDak uTTha tha tere qurb se mera badan

nam un hassas lamhon ka jawani ho gaya

kar diya tha main ne jo aawara patton par raqam

raaz wo ruswa hawaon ki zabani ho gaya

ek an-miT raushni tha arsh ki mehrab par

aadmi ke rup mein aa kar main fani ho gaya

jin ke sinon mein dhaDakta tha 'muzaffar' mera dil

aaj main un ke liye bhuli kahani ho gaya