aaj ek ik baada-kash masrur mai-KHane mein hai

aaj ik ik bāda-kash masrūr mai-ḳhāne meñ hai

taaza taaza iske uske sab ke paimāne meñ hai

shaiḳh jal uThegā to vo sho.ala mai-ḳhāne meñ hai

mai nahīñ ye ik dahaktī aag paimāne meñ hai

aaj dīvāna banā letā hai saarī ḳhalq ko

ik adā-e-ḳhās aisī us ke dīvāne meñ hai

der botal ke uThāne meñ lagegī kuchh na kuchh

mujh ko utnī hī bahut hai jitnī paimāne meñ hai

mai-kade meñ aane vaalo mai-kada mat chhoḌnā

marne jiine kā mazā kuchh hai to mai-ḳhāne meñ hai

pī rahā huuñ jī rahā huuñ shaad huuñ masrūr huuñ

zindagī hī zindagī labrez paimāne meñ hai

dil kī be-kaifī kā ye 'ālam huā ba.ad-e-junūñ

lutf jiine kā na gulshan meñ na vīrāne meñ hai

dhyān hai aahaT pe hasrat dil meñ hai āñkhoñ meñ dam

ham chale duniyā se un ko der agar aane meñ hai

jaag uThī qismat muqaddar jagmagā uTThā 'nasīr'

jalva-farmā aaj koī mere kāshāne meñ hai

aaj ek ek baada-kash masrur mai-KHane mein hai

taza taza iske uske sab ke paimane mein hai

shaiKH jal uThega to wo shoala mai-KHane mein hai

mai nahin ye ek dahakti aag paimane mein hai

aaj diwana bana leta hai sari KHalq ko

ek ada-e-KHas aisi us ke diwane mein hai

der botal ke uThane mein lagegi kuchh na kuchh

mujh ko utni hi bahut hai jitni paimane mein hai

mai-kade mein aane walo mai-kada mat chhoDna

marne jine ka maza kuchh hai to mai-KHane mein hai

pi raha hun ji raha hun shad hun masrur hun

zindagi hi zindagi labrez paimane mein hai

dil ki be-kaifi ka ye 'alam hua baad-e-junun

lutf jine ka na gulshan mein na virane mein hai

dhyan hai aahaT pe hasrat dil mein hai aankhon mein dam

hum chale duniya se un ko der agar aane mein hai

jag uThi qismat muqaddar jagmaga uTTha 'nasir'

jalwa-farma aaj koi mere kashane mein hai