mujhe teri ziyarat ho rahi hai

mujhe terī ziyārat ho rahī hai

baḌī achchhī 'ibādat ho rahī hai

ye sab terī 'atā hai mere murshid

jahāñ bhar meñ jo shohrat ho rahī hai

idhar to qatl karne par amāda

udhar chashm-e-muravvat ho rahī hai

nigāhoñ se nigāheñ mil rahī haiñ

qayāmat par qayāmat ho rahī hai

nigāheñ gar uThā.eñ to ye lagtā hai

qayāmat kī vazāhat ho rahī hai

tumhārī be-ruḳhī kā dekhiye to

tumhī se ab shikāyat ho rahī hai

haTā kar phuul kāñTe hī bichhā do

hameñ to chalne meñ diqqat ho rahī hai

kiye hassān aaqā kī jo 'āmir'

kahāñ tum se vo mid.hat ho rahī hai

mujhe teri ziyarat ho rahi hai

baDi achchhi 'ibaadat ho rahi hai

ye sab teri 'ata hai mere murshid

jahan bhar mein jo shohrat ho rahi hai

idhar to qatl karne par amada

udhar chashm-e-murawwat ho rahi hai

nigahon se nigahen mil rahi hain

qayamat par qayamat ho rahi hai

nigahen gar uThaen to ye lagta hai

qayamat ki wazahat ho rahi hai

tumhaari be-ruKHi ka dekhiye to

tumhi se ab shikayat ho rahi hai

haTa kar phul kanTe hi bichha do

hamein to chalne mein diqqat ho rahi hai

kiye hassan aaqa ki jo 'amir'

kahan tum se wo midhat ho rahi hai