hayat meri tumhaare hi gham shumar kare

hayāt merī tumhāre hī ġham shumār kare

dil shikasta bhī har vaqt zār-zār kare

zujāj sāmne rakhā hai aur dekho to

majāl hai jo mirī shakl kā shumār kare

jahāñ kā husn hai tasvīr-e-yār kī mānind

tamām 'umr koī kaise intizār kare

harīm-e-vajd hai qalb-e-hazīñ to hairat kyā

ki terī diid pe aur kyā dil-figār kare

mizāj achchhā hai dil bhī hai ḳhush bahut merā

sarāb aisā ki har koī e'tibār kare

ye fazl hī to hai baaqī huuñ 'ishq hone par

siyāh-baḳht ye kaise sirāt paar kare

kamāl-e-'ishq hai sahrā bhī ban gayā dariyā

kalām-e-fan hai jo dariyā ko regzār kare

visāl-o-hijr ke qisse kise sunā.ūñ ‘amal’

hai koī jo mire zaḳhmoñ kā chāra-kār kare

hayat meri tumhaare hi gham shumar kare

dil shikasta bhi har waqt zar-zar kare

zujaj samne rakha hai aur dekho to

majal hai jo meri shakl ka shumar kare

jahan ka husn hai taswir-e-yar ki manind

tamam 'umr koi kaise intizar kare

harim-e-wajd hai qalb-e-hazin to hairat kya

ki teri did pe aur kya dil-figar kare

mizaj achchha hai dil bhi hai KHush bahut mera

sarab aisa ki har koi e'tibar kare

ye fazl hi to hai baqi hun 'ishq hone par

siyah-baKHt ye kaise siraat par kare

kamal-e-'ishq hai sahra bhi ban gaya dariya

kalam-e-fan hai jo dariya ko regzar kare

visal-o-hijr ke qisse kise sunaun ‘amal’

hai koi jo mere zaKHmon ka chaara-kar kare