حیات میری تمہارے ہی غم شمار کرے

حیات میری تمہارے ہی غم شمار کرے

دل شکستہ بھی ہر وقت زار زار کرے

زجاج سامنے رکھا ہے اور دیکھو تو

مجال ہے جو مری شکل کا شمار کرے

جہاں کا حسن ہے تصویر یار کی مانند

تمام عمر کوئی کیسے انتظار کرے

حریم وجد ہے قلب حزیں تو حیرت کیا

کہ تیری دید پہ اور کیا دل فگار کرے

مزاج اچھا ہے دل بھی ہے خوش بہت میرا

سراب ایسا کہ ہر کوئی اعتبار کرے

یہ فضل ہی تو ہے باقی ہوں عشق ہونے پر

سیاہ بخت یہ کیسے صراط پار کرے

کمال عشق ہے صحرا بھی بن گیا دریا

کمال فن ہے جو دریا کو ریگزار کرے

وصال و ہجر کے قصے کسے سناؤں املؔ

ہے کوئی جو مرے زخموں کا چارہ کار کرے