aankhon mein bas ke dil mein sama kar chale gae

āñkhoñ meñ bas ke dil meñ samā kar chale ga.e

ḳhvābīda zindagī thī jagā kar chale ga.e

husn-e-azal kī shaan dikhā kar chale ga.e

ik vāqi.a sā yaad dilā kar chale ga.e

chehre tak āstīn vo lā kar chale ga.e

kyā raaz thā ki jis ko chhupā kar chale ga.e

rag rag meñ is tarah vo samā kar chale ga.e

jaise mujhī ko mujh se churā kar chale ga.e

merī hayāt-e-ishq ko de kar junūn-e-shauq

mujh ko tamām hosh banā kar chale ga.e

samjhā ke pastiyāñ mire auj-e-kamāl kī

apnī bulandiyāñ vo dikhā kar chale ga.e

apne faroġh-e-husn kī dikhlā ke vus.ateñ

mere hudūd-e-shauq baḌhā kar chale ga.e

har shai ko merī ḳhātir-e-nāshād ke liye

ā.īna-e-jamāl banā kar chale ga.e

aa.e the dil kī pyaas bujhāne ke vāste

ik aag sī vo aur lagā kar chale ga.e

aa.e the chashm-e-shauq kī hasrat nikālne

sar-tā-qadam nigāh banā kar chale ga.e

ab kārobār-e-ishq se fursat mujhe kahāñ

kaunain kā vo dard baḌhā kar chale ga.e

shukr-e-karam ke saath ye shikva bhī ho qubūl

apnā sā kyuuñ na mujh ko banā kar chale ga.e

lab thartharā ke rah ga.e lekin vo ai 'jigar'

jaate hue nigāh milā kar chale ga.e

aankhon mein bas ke dil mein sama kar chale gae

KHwabida zindagi thi jaga kar chale gae

husn-e-azal ki shan dikha kar chale gae

ek waqia sa yaad dila kar chale gae

chehre tak aastin wo la kar chale gae

kya raaz tha ki jis ko chhupa kar chale gae

rag rag mein is tarah wo sama kar chale gae

jaise mujhi ko mujh se chura kar chale gae

meri hayat-e-ishq ko de kar junun-e-shauq

mujh ko tamam hosh bana kar chale gae

samjha ke pastiyan mere auj-e-kamal ki

apni bulandiyan wo dikha kar chale gae

apne farogh-e-husn ki dikhla ke wusaten

mere hudud-e-shauq baDha kar chale gae

har shai ko meri KHatir-e-nashad ke liye

aaina-e-jamal bana kar chale gae

aae the dil ki pyas bujhane ke waste

ek aag si wo aur laga kar chale gae

aae the chashm-e-shauq ki hasrat nikalne

sar-ta-qadam nigah bana kar chale gae

ab karobar-e-ishq se fursat mujhe kahan

kaunain ka wo dard baDha kar chale gae

shukr-e-karam ke sath ye shikwa bhi ho qubul

apna sa kyun na mujh ko bana kar chale gae

lab tharthara ke rah gae lekin wo ai 'jigar'

jate hue nigah mila kar chale gae