aankhon mein hain rang-e-mahfil hazaron

āñkhoñ meñ haiñ rañg-e-mahfil hazāroñ

abhī rañg dikhlā.egā dil hazāroñ

hazāroñ haiñ ruḳhsār are til hazāroñ

fidā tere til par haiñ kyuuñ dil hazāroñ

agar bazm ārā.ī-e-dil yahī hai

baneñge hasīñ sham.a-e-mahfil hazāroñ

na girheñ khulīñ un ke band-e-qabā kī

khule uqde sar-basta mushkil hazāroñ

kyā terah tāroñ ko bhī ai shab-e-ġham

ye rū-e-falak par haiñ kyuuñ til hazāroñ

vo shai aaj vaa.iz ko ham ne pilā kar

miTā.e ḳhayālāt-e-bātil hazāroñ

bahut mil raheñge chhurī pherne ko

salāmat ye dil hai to qātil hazāroñ

ye gulchīñ ne kyuuñ phuul gulshan meñ toḌā

ki is par haiñ TuuTe anā dil hazāroñ

galī meñ tire hashr ke din bhī qātil

paḌe lūTte hoñge bismil hazāroñ

kahīñ qais hai ab na laila kahīñ hai

bagūle hazāroñ haiñ mahmil hazāroñ

ye hai mai-kada koī chauñkā.e kis ko

paḌe haiñ yahāñ mast-o-ġhāfil hazāroñ

na tarsā unheñ āb-e-ḳhanjar ko qātil

duā.eñ tujhe deñge bismil hazāroñ

lipaT kar na phir mere dāman se chhūTe

ga.e ḳhaar rah sū-e-manzil hazāroñ

ye kyā mashvare hashr meñ ho rahe haiñ

ye kyuuñ jam.a haiñ aaj qātil hazāroñ

raheñ tā-qayāmat javānī kī rāteñ

ye rāteñ haiñ to māh-e-kāmil hazāroñ

ubhāre se ubhre na gul tere aage

chahakne ko chahke anā dil hazāroñ

fann-e-sher bhī kyā hī āsān fan hai

jahāñ dekho is fan ke kāmil hazāroñ

'riyāz' un se kah do satā.eñ sambhal kar

bhare mere siine meñ haiñ dil hazāroñ

aankhon mein hain rang-e-mahfil hazaron

abhi rang dikhlaega dil hazaron

hazaron hain ruKHsar are til hazaron

fida tere til par hain kyun dil hazaron

agar bazm aarai-e-dil yahi hai

banenge hasin shama-e-mahfil hazaron

na girhen khulin un ke band-e-qaba ki

khule uqde sar-basta mushkil hazaron

kya terah taron ko bhi ai shab-e-gham

ye ru-e-falak par hain kyun til hazaron

wo shai aaj waiz ko hum ne pila kar

miTae KHayalat-e-baatil hazaron

bahut mil rahenge chhuri pherne ko

salamat ye dil hai to qatil hazaron

ye gulchin ne kyun phul gulshan mein toDa

ki is par hain TuTe ana dil hazaron

gali mein tere hashr ke din bhi qatil

paDe luTte honge bismil hazaron

kahin qais hai ab na laila kahin hai

bagule hazaron hain mahmil hazaron

ye hai mai-kada koi chaunkae kis ko

paDe hain yahan mast-o-ghafil hazaron

na tarsa unhen aab-e-KHanjar ko qatil

duaen tujhe denge bismil hazaron

lipaT kar na phir mere daman se chhuTe

gae KHar rah su-e-manzil hazaron

ye kya mashware hashr mein ho rahe hain

ye kyun jama hain aaj qatil hazaron

rahen ta-qayamat jawani ki raaten

ye raaten hain to mah-e-kaamil hazaron

ubhaare se ubhre na gul tere aage

chahakne ko chahke ana dil hazaron

fann-e-sher bhi kya hi aasan fan hai

jahan dekho is fan ke kaamil hazaron

'riyaz' un se kah do sataen sambhal kar

bhare mere sine mein hain dil hazaron