aankhon se pi nazar se nazar ko mila ke pi

āñkhoñ se pī nazar se nazar ko milā ke pī

pī aur naqāb-e-husn-e-do-ālam uThā ke pī

muusā ne pī hai tuur ne pī hai mai-e-jamāl

tū bhī harīm-e-nāz ke parde uThā ke pī

mai-ḳhāna-e-azal meñ khiñchī hai sharāb-e-ishq

tū hastī-e-jahān ko sāġhar banā ke pī

ka.aba ho but-kada ho ki vo kū-e-dost ho

dil terā chāhe jis meñ usī ghar meñ jā ke pī

allāh ke habīb kī ulfat kī hai sharāb

pī jaa.e jis qadar ḳhum-o-sāġhar uThā ke pī

in manziloñ meñ aql-o-ḳhirad kā nahīñ hai kaam

ai be-ḳhud-e-jamāl zarā hosh uḌā ke pī

jalve pilā rahe haiñ jo 'qaisar' sharāb-e-ishq

ai mard-e-pāk-bāz tū ghar meñ ḳhudā ke pī

aankhon se pi nazar se nazar ko mila ke pi

pi aur naqab-e-husn-e-do-alam uTha ke pi

musa ne pi hai tur ne pi hai mai-e-jamal

tu bhi harim-e-naz ke parde uTha ke pi

mai-KHana-e-azal mein khinchi hai sharab-e-ishq

tu hasti-e-jahan ko saghar bana ke pi

kaba ho but-kada ho ki wo ku-e-dost ho

dil tera chahe jis mein usi ghar mein ja ke pi

allah ke habib ki ulfat ki hai sharab

pi jae jis qadar KHum-o-saghar uTha ke pi

in manzilon mein aql-o-KHirad ka nahin hai kaam

ai be-KHud-e-jamal zara hosh uDa ke pi

jalwe pila rahe hain jo 'qaisar' sharab-e-ishq

ai mard-e-pak-baz tu ghar mein KHuda ke pi