aap mashuq kya ho gae

aap ma.ashūq kyā ho ga.e

āshiqoñ ke ḳhudā ho ga.e

tum ko achchhā musalmāñ kiyā

aur kāfir-adā ho ga.e

chashm-e-sāqī se pī lī sharāb

shaiḳh-jī pārsā ho ga.e

us ne mayyat pe aa kar kahā

tum to sach-much ḳhafā ho ga.e

aa ga.e merī mayyat pe tum

saare va.ade vafā ho ga.e

ḳhair ab kārvāñ kī nahīñ

rāhzan rahnumā ho ga.e

aur kuchh ġham nahīñ ġham ye hai

aap mil kar judā ho ga.e

'purnam' us be-vafā ke liye

mere aañsū duā ho ga.e

aap mashuq kya ho gae

aashiqon ke KHuda ho gae

tum ko achchha musalman kiya

aur kafir-ada ho gae

chashm-e-saqi se pi li sharab

shaiKH-ji parsa ho gae

us ne mayyat pe aa kar kaha

tum to sach-much KHafa ho gae

aa gae meri mayyat pe tum

sare wade wafa ho gae

KHair ab karwan ki nahin

rahzan rahnuma ho gae

aur kuchh gham nahin gham ye hai

aap mil kar juda ho gae

'purnam' us be-wafa ke liye

mere aansu dua ho gae