haqiqat us bala-nosh-e-azal ki shaiKH kya jaane

haqīqat us balā-nosh-e-azal kī shaiḳh kyā jaane

jise taḳhlīq-e-hastī meñ farishte tak na pahchāne

junūñ kī kār-farmā.ī kahāñ tak hai ḳhudā jaane

ki tā-hadd-e-nazar 'āqil nazar aate haiñ vīrāne

kuchh aañsū chashm-e-giryāñ meñ kuchh aañsū qalb-e-biryāñ meñ

chalā huuñ bārgāh-e-husn meñ lekar ye nazrāne

bajā ahkām-e-zabt-e-ġham magar is dil ko kyā kahiye

tumhārā naam aate hī chhalak jaate haiñ paimāne

nazar manzil pe hai aur pāvauñ haiñ sahrā-e-vahshat meñ

junūñ meñ bhī balā kā hosh rakhte haiñ ye dīvāne

haiñ tafsīr-e-rumūz-e-kun mire ash.ār ai 'āqil

koī samjhe to kyā samjhe koī jaane to kyā jaane

haqiqat us bala-nosh-e-azal ki shaiKH kya jaane

jise taKHliq-e-hasti mein farishte tak na pahchane

junun ki kar-farmai kahan tak hai KHuda jaane

ki ta-hadd-e-nazar 'aqil nazar aate hain virane

kuchh aansu chashm-e-giryan mein kuchh aansu qalb-e-biryan mein

chala hun bargah-e-husn mein lekar ye nazrane

baja ahkaam-e-zabt-e-gham magar is dil ko kya kahiye

tumhaara nam aate hi chhalak jate hain paimane

nazar manzil pe hai aur pawaun hain sahra-e-wahshat mein

junun mein bhi bala ka hosh rakhte hain ye diwane

hain tafsir-e-rumuz-e-kun mere ashaar ai 'aqil

koi samjhe to kya samjhe koi jaane to kya jaane