mere KHun-e-arzu ko wo samajh rahe hain pani

mere ḳhūn-e-ārzū ko vo samajh rahe haiñ paanī

unheñ hosh tak na aayā mirī luT ga.ī javānī

maiñ ne pahle hī kahā thā tirī har adā hai faanī

dil-e-bad-nasīb tū ne mirī baat hī na maanī

mujhe aaj hī pilā de na tavakkul pe Taal saaqī

ki chhalak na jaa.e kal tak mirā jām-e-zindagānī

na uḌā tū Thokaroñ se mirī ḳhāk-e-qabr zālim

yahī āḳhirī bachī hai tire hijr kī nishānī

mire sher sun rahe haiñ ye mah-o-nujūm 'āqil'

mujhe le uḌī hai merī yahī tarz-e-kHushbayānī

mere KHun-e-arzu ko wo samajh rahe hain pani

unhen hosh tak na aaya meri luT gai jawani

main ne pahle hi kaha tha teri har ada hai fani

dil-e-bad-nasib tu ne meri baat hi na mani

mujhe aaj hi pila de na tawakkul pe Tal saqi

ki chhalak na jae kal tak mera jam-e-zindagani

na uDa tu Thokaron se meri KHak-e-qabr zalim

yahi aaKHiri bachi hai tere hijr ki nishani

mere sher sun rahe hain ye mah-o-nujum 'aqil'

mujhe le uDi hai meri yahi tarz-e-kHushbayani