میرے خون آرزو کو وہ سمجھ رہے ہیں پانی

میرے خون آرزو کو وہ سمجھ رہے ہیں پانی

انہیں ہوش تک نہ آیا مری لٹ گئی جوانی

میں نے پہلے ہی کہا تھا تری ہر ادا ہے فانی

دل بد نصیب تو نے مری بات ہی نہ مانی

مجھے آج ہی پلا دے نہ توکل پہ ٹال ساقی

کہ چھلک نہ جائے کل تک مرا جام زندگانی

نہ اڑا تو ٹھوکروں سے مری خاک قبر ظالم

یہی آخری بچی ہے ترے ہجر کی نشانی

مرے شعر سن رہے ہیں یہ مہہ‌ و نجوم عاقلؔ

مجھے لے اڑی ہے میری یہی طرز خوش بیانی