kuchh taza sitam ab dil ke liye ijad karo to behtar hai

kuchh taaza sitam ab dil ke liye ījād kaaro to behtar hai

ye jaur-o-jafā kā ḳhūgar hai be-dād kaaro to behtar hai

is ḳhāna-e-dil ko tum ā-kar ābād karo to behtar hai

nāshād jise sau-bār kiyā ab shaad kaaro to behtar hai

taslīm mujhe to sab kuchh hai ilzām jo mujh par rakhte ho

toḌe haiñ sitam jo tum ne magar vo yaad kaaro to behtar hai

haiñ dar pe tumhāre kab se khaḌe kuchh ishq ke maare ahl-e-vafā

ye lutf-o-karam ke tālib haiñ dil-shād karo to behtar hai

phir dil meñ talātum ho barpā mañjdhār meñ kashtī aa jaa.e

phir aake safīna hastī kā barbād kaaro to behtar hai

ham bach ke bhalā jā.eñge kahāñ ham ko asīr-e-zulf kaaro

is qaid-o-rasan se hāsil kyā āzād karo to behtar hai

ye sozish aah qalb-e-hazīñ kuchh rañg yaqīnan lā.egī

māyūs na ho tāsīr se tum fariyād karo to behtar hai

kuchh taza sitam ab dil ke liye ijad karo to behtar hai

ye jaur-o-jafa ka KHugar hai be-dad karo to behtar hai

is KHana-e-dil ko tum aa-kar aabaad karo to behtar hai

nashad jise sau-bar kiya ab shad karo to behtar hai

taslim mujhe to sab kuchh hai ilzam jo mujh par rakhte ho

toDe hain sitam jo tum ne magar wo yaad karo to behtar hai

hain dar pe tumhaare kab se khaDe kuchh ishq ke mare ahl-e-wafa

ye lutf-o-karam ke talib hain dil-shad karo to behtar hai

phir dil mein talatum ho barpa manjdhaar mein kashti aa jae

phir aake safina hasti ka barbaad karo to behtar hai

hum bach ke bhala jaenge kahan hum ko asir-e-zulf karo

is qaid-o-rasan se hasil kya aazad karo to behtar hai

ye sozish aah qalb-e-hazin kuchh rang yaqinan laegi

mayus na ho tasir se tum fariyaad karo to behtar hai