phir na paoge mohabbat ka maza mere baad

phir na pāoge mohabbat kā mazā mere ba.ad

haaye uTh jā.egī duniyā se vafā mere ba.ad

sun sakoge na kabhī āh-o-bukā mere ba.ad

Duub jā.egā ye sailāb mere ba.ad

paañv rakhegā sar ḳhaar na vahshī koī

ḳhaak chāTegī bayābāñ kī havā mere ba.ad

phir na aa.egī kisī dil pe qiyāmat aisī

maut kī god meñ so.egī fanā mere ba.ad

kaun sīñchegā use ḳhūn-e-jigar se apne

rañg kyā degī bhalā barg-e-hinā mere ba.ad

hama-tan gosh banā kaun yahāñ baiThegā

kis ko paiġhām sunā.egī sabā mere ba.ad

kaun vahshat meñ nikal jā.egā sahrā sahrā

thak ke dam toḌ na deñ ābla-pā mere ba.ad

nok har ḳhaar pe taḌpegā na vahshī koī

ḳhūn-e-dil ro.egī sahrā kī fazā mere ba.ad

ġham na hogā na alam hogā na andāz-e-sitam

aa.egī haaye mohabbat kī sadā mere ba.ad

ba.ad marne ke vo karte haiñ tamannā merī

kar rahe haiñ vo jiine kī duā mere ba.ad

chand aañsū vo bahā.enge yaqīnan 'ārif'

mil hī jā.egā vafāoñ kā silā mere ba.ad

phir na paoge mohabbat ka maza mere baad

haye uTh jaegi duniya se wafa mere baad

sun sakoge na kabhi aah-o-buka mere baad

Dub jaega ye sailab mere baad

panw rakhega sar KHar na wahshi koi

KHak chaTegi bayaban ki hawa mere baad

phir na aaegi kisi dil pe qiyamat aisi

maut ki god mein soegi fana mere baad

kaun sinchega use KHun-e-jigar se apne

rang kya degi bhala barg-e-hina mere baad

hama-tan gosh bana kaun yahan baiThega

kis ko paigham sunaegi saba mere baad

kaun wahshat mein nikal jaega sahra sahra

thak ke dam toD na den aabla-pa mere baad

nok har KHar pe taDpega na wahshi koi

KHun-e-dil roegi sahra ki faza mere baad

gham na hoga na alam hoga na andaz-e-sitam

aaegi haye mohabbat ki sada mere baad

baad marne ke wo karte hain tamanna meri

kar rahe hain wo jine ki dua mere baad

chand aansu wo bahaenge yaqinan 'arif'

mil hi jaega wafaon ka sila mere baad