ye kis Dhab se aankh uski ji par paDi hai

ye kis Dhab se aañkh us kī jī par paḌī hai

nikaltī nahīñ phāñs aisī gaḌhī hai

barābar kī hai chheḌ milnā na milnā

kaThin hai hamāre liye jo ghaḌī hai

milī aañkh māthe se Tapkā pasīnā

ye chāhat ke sāvan kī pahlī jhaḌī hai

hilā.e koī hoñT kyā us ke aage

chhurī taane chitvan to sar par khaḌī hai

na.e ruup bhartā hai chāhat kā maalā

jo rakkho to guchchā uThā lo laḌī hai

jahāñ apne hī bas kā ho tinkā tinkā

kahīñ raaj se baḌh ke vo jhoñpaḌī hai

ye kis kis ko us kī lagāvaT ne maarā

jidhar dekhiye ek piTTas paḌī hai

sulajh lī na jab tak tire chap kī gutthī

kaleje meñ saañs aate jaate aḌī hai

achānak taḌap kyuuñ baḌhī ab meñ samjhā

ulaT kar mirī haaye mujh par paḌī hai

batā degī bhed 'ārzū' niiñd uḌ kar

ki jo raat chhoTī thī ab kyuuñ baḌī hai

ye kis Dhab se aankh us ki ji par paDi hai

nikalti nahin phans aisi gaDhi hai

barabar ki hai chheD milna na milna

kaThin hai hamare liye jo ghaDi hai

mili aankh mathe se Tapka pasina

ye chahat ke sawan ki pahli jhaDi hai

hilae koi honT kya us ke aage

chhuri tane chitwan to sar par khaDi hai

nae rup bharta hai chahat ka mala

jo rakkho to guchcha uTha lo laDi hai

jahan apne hi bas ka ho tinka tinka

kahin raj se baDh ke wo jhonpaDi hai

ye kis kis ko us ki lagawaT ne mara

jidhar dekhiye ek piTTas paDi hai

sulajh li na jab tak tere chap ki gutthi

kaleje mein sans aate jate aDi hai

achanak taDap kyun baDhi ab mein samjha

ulaT kar meri haye mujh par paDi hai

bata degi bhed 'arzu' nind uD kar

ki jo raat chhoTi thi ab kyun baDi hai