ہونٹ سے جب ساغر لگتا ہے

ہونٹ سے جب ساغر لگتا ہے

نامِ عشق سے ڈر لگتا ہے

آ جاتی ہے دانش مندی

پیار میں جب خنجر لگتا ہے

جو بھی وفا کے نغمے گائے

وہ مجھے غارت گر لگتا ہے

سر سے اٹھے جو باپ کا سایہ

پھر بیٹا بے پر لگتا ہے

رنج و الم اپنے ہی دیں تو

دل غم کا دفتر لگتا ہے

سونے کے پنجرے سے بہتر

مجھ کو میرا گھر لگتا ہے

ڈھائے ظلم و ستم مفلس پر

اُس کا دل پتھر لگتا ہے

نقشِ قدم مرشد کے چل کر

انساں بالا تر لگتا ہے

دل لے لیتا ہے دل دے کر

یوں وہ سودا گر لگتا ہے

اس میں نہیں کوئی ایفائی

کیوں یہ مجھے اکثر لگتا ہے

اندازِ سخن رہبرؔ سے سیکھو

وہ شاعر برتر لگتا ہے