husn pariyon ka suna karte the par kuchh bhi nahin

husn pariyoñ kā sunā karte the par kuchh bhī nahīñ

duur kī Dhol suhānī thī magar kuchh bhī nahīñ

maiñ na mānūñgā na mānūñgā na mānūñgā kabhī

ham pe kyā kuchh huā kyā un ko ḳhabar kuchh bhī nahīñ

dil mujhe hijr meñ samjhātā hai aur dil ko ye maiñ

aur shab-bhar ye musībat hai sahar kuchh bhī nahīñ

fikr-e-hastī meñ jo mar-mar ke khulā bhī to ye haal

naqsh-bar-āb to kuchh bhī hai bashar kuchh bhī nahīñ

pusht-e-ḳhat saaf dikhā kar mujhe qāsid ne kahā

bas javāb un kā yahī hai ki idhar kuchh bhī nahīñ

kyuuñ mujhe dekh ke chup-chup ho sabab is kā kyā

tum to kahte the mohabbat meñ asar kuchh bhī nahīñ

ek sā haal mohabbat meñ hai apnā kab se

sunte the rañj kī bhī had hai magar kuchh bhī nahīñ

ham ne duniyā ko jo dekhā to khulā ye 'āshiq'

be-hunar ḳhuub haiñ sab ahl-e-hunar kuchh bhī nahīñ

husn pariyon ka suna karte the par kuchh bhi nahin

dur ki Dhol suhani thi magar kuchh bhi nahin

main na manunga na manunga na manunga kabhi

hum pe kya kuchh hua kya un ko KHabar kuchh bhi nahin

dil mujhe hijr mein samjhata hai aur dil ko ye main

aur shab-bhar ye musibat hai sahar kuchh bhi nahin

fikr-e-hasti mein jo mar-mar ke khula bhi to ye haal

naqsh-bar-ab to kuchh bhi hai bashar kuchh bhi nahin

pusht-e-KHat saf dikha kar mujhe qasid ne kaha

bas jawab un ka yahi hai ki idhar kuchh bhi nahin

kyun mujhe dekh ke chup-chup ho sabab is ka kya

tum to kahte the mohabbat mein asar kuchh bhi nahin

ek sa haal mohabbat mein hai apna kab se

sunte the ranj ki bhi had hai magar kuchh bhi nahin

hum ne duniya ko jo dekha to khula ye 'ashiq'

be-hunar KHub hain sab ahl-e-hunar kuchh bhi nahin