aashkara raaz-e-husn-e-kibriya kyunkar hua

āshkārā rāz-e-husn-e-kibriyā kyūñkar huā

rah ke sau pardoñ meñ ālam-āshnā kyūñkar huā

ai masīhā mere dushman hoñ shifā se nā-umīd

tū salāmat dard merā lā-davā kyūñkar huā

apnā banda bhī mujhe kahtā hai phir muhtāj bhī

tujh se shāhanshāh kā banda gadā kyūñkar huā

pūchh le qātil zabān-e-teġh se sab sar-guzasht

kushte kis muñh se batā.eñ kyā huā kyūñkar huā

jīte-jī barsoñ maiñ taḌpā tab na lī tum ne ḳhabar

mar ga.e par pūchhte ho kyā huā kyūñkar huā

maiñ na mānūñgā ki dī aġhyār ne tarġhīb-e-qatl

dushmanoñ se dostī kā haq adā kyūñkar huā

maiñ na mānūñgā na ā.īne kā hai saarā qusūr

ḳhud-ba-ḳhud vo ḳhud-pasand-o-ḳhud-numā kyūñkar huā

us ne khīñchī teġh yaañ sar jhuk gayā qissa miTā

ḳhalq ye kyuuñ pūchhtī hai mājrā kyūñkar huā

chāTtī hai kyuuñ zabān-e-teġh-e-qātil baar baar

be-namak chhiḌke ye zaḳhmoñ meñ mazā kyūñkar huā

ulfat-e-gesū balā thī mar gayā phañs kar 'amīr'

hai baḌā jhagḌā na pūchho faisla kyūñkar huā

aashkara raaz-e-husn-e-kibriya kyunkar hua

rah ke sau pardon mein aalam-ashna kyunkar hua

ai masiha mere dushman hon shifa se na-umid

tu salamat dard mera la-dawa kyunkar hua

apna banda bhi mujhe kahta hai phir muhtaj bhi

tujh se shahanshah ka banda gada kyunkar hua

puchh le qatil zaban-e-tegh se sab sar-guzasht

kushte kis munh se bataen kya hua kyunkar hua

jite-ji barson main taDpa tab na li tum ne KHabar

mar gae par puchhte ho kya hua kyunkar hua

main na manunga ki di aghyar ne targhib-e-qatl

dushmanon se dosti ka haq ada kyunkar hua

main na manunga na aaine ka hai sara qusur

KHud-ba-KHud wo KHud-pasand-o-KHud-numa kyunkar hua

us ne khinchi tegh yan sar jhuk gaya qissa miTa

KHalq ye kyun puchhti hai majra kyunkar hua

chaTti hai kyun zaban-e-tegh-e-qatil bar bar

be-namak chhiDke ye zaKHmon mein maza kyunkar hua

ulfat-e-gesu bala thi mar gaya phans kar 'amir'

hai baDa jhagDa na puchho faisla kyunkar hua