munh se burqa nahin uThate hain

muñh se burqa' nahīñ uThāte haiñ

ye nayā ruup ab dikhāte haiñ

be-par-o-bāl ab taraste haiñ

jin ke par hai mazā uḌāte haiñ

lab-e-shīrīñ kā tere sun kar shor

ḳhūb-rū tujh pe zahr khāte haiñ

pech meñ us ke zulf ke ham se

haiñ paḌe pech-o-tāb khāte haiñ

tere dar kī jo chhānte the ḳhaak

ab to ve kīmiyā banāte haiñ

jab se parda-nashīñ hue haiñ ve

ḳhvāb meñ bhī nahīñ ve aate haiñ

kyūñkar us ġhuncha-lab se baat kareñ

ham nahīñ koī raah paate haiñ

tere kūcha meñ baiThte haiñ vahī

sar pe jo sau balā uThāte haiñ

lab-e-shīrīñ ke ghaaT par ab to

'āshnā' bār-bār aate haiñ

munh se burqa' nahin uThate hain

ye naya rup ab dikhate hain

be-par-o-baal ab taraste hain

jin ke par hai maza uDate hain

lab-e-shirin ka tere sun kar shor

KHub-ru tujh pe zahr khate hain

pech mein us ke zulf ke hum se

hain paDe pech-o-tab khate hain

tere dar ki jo chhante the KHak

ab to we kimiya banate hain

jab se parda-nashin hue hain we

KHwab mein bhi nahin we aate hain

kyunkar us ghuncha-lab se baat karen

hum nahin koi rah pate hain

tere kucha mein baiThte hain wahi

sar pe jo sau bala uThate hain

lab-e-shirin ke ghaT par ab to

'ashna' bar-bar aate hain