ilahi bandh rahi hai aaj gulshan mein hawa kis ki

ilāhī bañdh rahī hai aaj gulshan meñ havā kis kī

liye phirtī hai ḳhushbū dam-ba-dam bād-e-sabā kis kī

huī hai is tarah se be-asar yārab duā kis kī

phir aatī hai falak se jā ke āh-e-nā-rasā kis kī

luTā jaatā hai dil aur aaj lahroñ par ye lahreñ haiñ

jigar meñ ban ke nāgin Dastī hai zulf-e-dotā kis kī

kiyā vaar us ne ġhairoñ par mare ham rashk ke maare

tamāshā hai ilāhī lag ga.ī kis ko qazā kis kī

kahāñ mumkin hai kis se intizār-e-yār ho mujh sā

rahegī phir bhī yūñhī misl-e-nargis aañkh vā kis kī

tah-o-bālā huā jaatā hai dil pahlū meñ kyā baa.is

chalā aatā hai kaun aatī hai ghuñgrū kī sadā kis kī

laḌīñ zulfoñ se āñkheñ aur dil kī shāmateñ aa.iiñ

paḌī hai yā-ilāhī kis ke sar jā kar balā kis kī

ḳhafā sayyād hai chiiñ bar jabīñ gulchīñ hai kyā baa.is

burā kis kā kiyā taqsīr kī ham ne bhalā kis kī

ilahi bandh rahi hai aaj gulshan mein hawa kis ki

liye phirti hai KHushbu dam-ba-dam baad-e-saba kis ki

hui hai is tarah se be-asar yarab dua kis ki

phir aati hai falak se ja ke aah-e-na-rasa kis ki

luTa jata hai dil aur aaj lahron par ye lahren hain

jigar mein ban ke nagin Dasti hai zulf-e-dota kis ki

kiya war us ne ghairon par mare hum rashk ke mare

tamasha hai ilahi lag gai kis ko qaza kis ki

kahan mumkin hai kis se intizar-e-yar ho mujh sa

rahegi phir bhi yunhi misl-e-nargis aankh wa kis ki

tah-o-baala hua jata hai dil pahlu mein kya bais

chala aata hai kaun aati hai ghungru ki sada kis ki

laDin zulfon se aankhen aur dil ki shamaten aain

paDi hai ya-ilahi kis ke sar ja kar bala kis ki

KHafa sayyaad hai chin bar jabin gulchin hai kya bais

bura kis ka kiya taqsir ki hum ne bhala kis ki