الٰہی بندھ رہی ہے آج گلشن میں ہوا کس کی

الٰہی بندھ رہی ہے آج گلشن میں ہوا کس کی

لیے پھرتی ہے خوشبو دم بدم باد صبا کس کی

ہوئی ہے اس طرح سے بے اثر یا رب دعا کس کی

پھر آتی ہے فلک سے جا کے آہ نارسا کس کی

لٹا جاتا ہے دل اور آج لہروں پر یہ لہریں ہیں

جگر میں بن کے ناگن ڈستی ہے زلف دوتا کس کی

کیا وار اس نے غیروں پر مرے ہم رشک کے مارے

تماشا ہے الٰہی لگ گئی کس کو قضا کس کی

کہاں ممکن ہے کس سے انتظار یار ہو مجھ سا

رہے گی پھر بھی یوں ہی مثل نرگس آنکھ وا کس کی

تہ و بالا ہوا جاتا ہے دل پہلو میں کیا باعث

چلا آتا ہے کون آتی ہے گھنگرو کی صدا کس کی

لڑیں زلفوں سے آنکھیں اور دل کی شامتیں آئیں

پڑی ہے یا الٰہی کس کے سر جا کر بلا کس کی

خفا صیاد ہے چیں بر جبیں گلچیں ہے کیا باعث

برا کس کا کیا تقصیر کی ہم نے بھلا کس کی