ab sunae kise haal-e-dil-e-sozan koi

ab sunā.e kise hāl-e-dil-e-sozāñ koī

sāhab-e-dard to miltā nahīñ insāñ koī

ḳhaak kar ke mire zarroñ ko pareshāñ kar de

dil meñ rah jaaye jafā-kār na armāñ koī

imtihāñ bhī nigah-e-shauq kā ho jā.egā

ho ke dekhe to sar-e-bazm numāyāñ koī

mire sayyād ko bā-vasf-e-asīrī hai ye ḳhauf

maiñ qafas meñ bhī banā lūñgā gulistāñ koī

be-kasī par bhī merā hausla-e-dil dekhiye

pher to de mirī jānib ruḳh-e-tūfāñ koī

ham sambhalne bhī na paa.e the sar-e-mahfil-e-nāz

luuT ke le gayā sarmāya-e-īmāñ koī

bāda-e-ishq se parhez sitam hai zāhid

be-piye bhī kahīñ hotā hai musalmāñ koī

is qadar yaad hai bas ishq kī rūdād 'hayāt'

jaise dekhā thā kabhī ḳhvāb-e-pareshāñ koī

ab sunae kise haal-e-dil-e-sozan koi

sahab-e-dard to milta nahin insan koi

KHak kar ke mere zarron ko pareshan kar de

dil mein rah jaye jafa-kar na arman koi

imtihan bhi nigah-e-shauq ka ho jaega

ho ke dekhe to sar-e-bazm numayan koi

mere sayyaad ko ba-wasf-e-asiri hai ye KHauf

main qafas mein bhi bana lunga gulistan koi

be-kasi par bhi mera hausla-e-dil dekhiye

pher to de meri jaanib ruKH-e-tufan koi

hum sambhalne bhi na pae the sar-e-mahfil-e-naz

luT ke le gaya sarmaya-e-iman koi

baada-e-ishq se parhez sitam hai zahid

be-piye bhi kahin hota hai musalman koi

is qadar yaad hai bas ishq ki rudad 'hayat'

jaise dekha tha kabhi KHwab-e-pareshan koi