qissa-e-dard wo sunte unhen parwa kya hai

qissa-e-dard vo sunte unheñ parvā kyā hai

ai dil-e-zār ye āḳhir tujhe saudā kyā hai

har taraf lutf-r-do-'ālam ki bar aa.ī ummīd

mujh se vo pūchhte haiñ terī tamannā kyā hai

liye jaatā hai mujhe phir tire kūcha kī taraf

dil-e-muztar kā ḳhudā jaane irāda kyā hai

tujh ko ai chashm-e-fusūñ-sāz nigāhoñ kī qasam

sach batā de dil-e-marhūm kā qissa kyā hai

ho chukī ḳhatm du'ā.eñ na huā 'ahd-e-vafā

jaane qismat meñ dil-e-zār kī likkhā kyā hai

parda-dārī ne tirī kar diyā rusvā tujh ko

kuchh ḳhabar bhī hai ye tirā charchā kyā hai

shāfe'-e-hashr meñ jaamī tirā mahshar meñ ‘ġhafūr’

phir batā ḳhauf tujhe roz-e-jazā kā kyā hai

qissa-e-dard wo sunte unhen parwa kya hai

ai dil-e-zar ye aaKHir tujhe sauda kya hai

har taraf lutf-r-do-'alam ki bar aai ummid

mujh se wo puchhte hain teri tamanna kya hai

liye jata hai mujhe phir tere kucha ki taraf

dil-e-muztar ka KHuda jaane irada kya hai

tujh ko ai chashm-e-fusun-saz nigahon ki qasam

sach bata de dil-e-marhum ka qissa kya hai

ho chuki KHatm du'aen na hua 'ahd-e-wafa

jaane qismat mein dil-e-zar ki likkha kya hai

parda-dari ne teri kar diya ruswa tujh ko

kuchh KHabar bhi hai ye tera charcha kya hai

shafe'-e-hashr mein jami tera mahshar mein ‘ghafur’

phir bata KHauf tujhe roz-e-jaza ka kya hai