ek iztirab-e-shauq ki duniya liye hue

ik iztirāb-e-shauq kī duniyā liye hue

maiñ phir rahā huuñ terī tamannā liye hue

har shai meñ dekhtā huuñ koī manzar-e-jamāl

aayā huuñ tere husn kā jalvā liye hue

kab aa.e haiñ vo pūchhne bīmār-e-ġham kā haal

jab jā rahe haiñ log janāzā liye hue

sadma marīz-e-ġham kā uThāyā na jā.egā

baiThe haiñ kyuuñ janāb masīhā liye hue

dekhā hai ham ne tum ko tasavvur meñ bārhā

ik jumbish-e-nigāh meñ kyā kyā liye hue

rūdād-e-ġham sunāne chalā huuñ kisī ko maiñ

ashkoñ meñ tarjumānī-e-dariyā liye hue

kyā fikr mujh ko baḳhshish 'isyāñ kī ho ‘ġhafūr’

āḳhir to huuñ maiñ un kā sahārā liye hue

ek iztirab-e-shauq ki duniya liye hue

main phir raha hun teri tamanna liye hue

har shai mein dekhta hun koi manzar-e-jamal

aaya hun tere husn ka jalwa liye hue

kab aae hain wo puchhne bimar-e-gham ka haal

jab ja rahe hain log janaza liye hue

sadma mariz-e-gham ka uThaya na jaega

baiThe hain kyun janab masiha liye hue

dekha hai hum ne tum ko tasawwur mein barha

ek jumbish-e-nigah mein kya kya liye hue

rudad-e-gham sunane chala hun kisi ko main

ashkon mein tarjumani-e-dariya liye hue

kya fikr mujh ko baKHshish 'isyan ki ho ‘ghafur’

aaKHir to hun main un ka sahaara liye hue