subut ab is se baDh kar aur kya hai teri azmat ka

subūt ab is se baḌh kar aur kyā hai terī 'azmat kā

ki lahrātā hai parcham 'arsh par terī vilāyat kā

hayāt-e-kHizr ik jānib aur ik pal terī sohbat kā

do-'ālam ik taraf aur ek sajda terī chaukhaT kā

koī ham-sar nahīñ terā tū yaktā-e-zamāna hai

shahādat de rahā hai zarra-zarra terī vahdat kā

vo sābir kaliyarī hoñ yā mu’īnuddīn ajmerī

har ik muhtāj hai tauhīd meñ terī qayādat kā

shahanshāh-e-vilāyat hai 'alī sher-e-ḳhudā hai tū

rahā mamnūn hai har ik nabī terī 'ināyat kā

zarūrat kyā use phir saum-o-sajde aur taqvā kī

sharaf hāsil ho jis ko is jahāñ meñ terī sohbat kā

jamāl-e-panjatan hai zau-fishāñ rū-e-munavvar par

hai raushan jis se 'ālam nuur hai vo terī tal’at kā

kahā thā lan-tarānī bhī kalīm-ullāh se lekin

sharaf hāsil hai har mushtāq ko ab terī rūyat kā

tujhī ko jāgte sote tire kāvish ne dekhā hai

hai jalva-e-huzūrī ḳhaas tohfa terī ulfat kā

subut ab is se baDh kar aur kya hai teri 'azmat ka

ki lahraata hai parcham 'arsh par teri wilayat ka

hayat-e-kHizr ek jaanib aur ek pal teri sohbat ka

do-'alam ek taraf aur ek sajda teri chaukhaT ka

koi ham-sar nahin tera tu yakta-e-zamana hai

shahadat de raha hai zarra-zarra teri wahdat ka

wo sabir kaliyari hon ya mu’inuddin ajmeri

har ek muhtaj hai tauhid mein teri qayaadat ka

shahanshah-e-wilayat hai 'ali sher-e-KHuda hai tu

raha mamnun hai har ek nabi teri 'inayat ka

zarurat kya use phir saum-o-sajde aur taqwa ki

sharaf hasil ho jis ko is jahan mein teri sohbat ka

jamal-e-panjatan hai zau-fishan ru-e-munawwar par

hai raushan jis se 'alam nur hai wo teri tal’at ka

kaha tha lan-tarani bhi kalim-ullah se lekin

sharaf hasil hai har mushtaq ko ab teri ruyat ka

tujhi ko jagte sote tere kawish ne dekha hai

hai jalwa-e-huzuri KHas tohfa teri ulfat ka