dil tha ki phul ban ke bikharta chala gaya

dil thā ki phuul ban ke bikhartā chalā gayā

tasvīr kā jamāl ubhartā chalā gayā

shaam aa.ī aur aa.ī kuchh is ehtimām se

vo gesū-e-darāz bikhartā chalā gayā

ġham kī lakīr thī ki ḳhushī kā udaas rañg

har naqsh ā.īne meñ ubhartā chalā gayā

har chand rāste meñ the kāñTe bichhe hue

jis ko terī talab thī guzartā chalā gayā

jab tak tirī nigāh ne taufīq dī mujhe

maiñ terī zulf ban ke sañvartā chalā gayā

do-hī to kaam the dil-e-nādāñ ko ai 'adam'

jiitā chalā gayā kabhī martā chalā gayā

dil tha ki phul ban ke bikharta chala gaya

taswir ka jamal ubharta chala gaya

sham aai aur aai kuchh is ehtimam se

wo gesu-e-daraaz bikharta chala gaya

gham ki lakir thi ki KHushi ka udas rang

har naqsh aaine mein ubharta chala gaya

har chand raste mein the kanTe bichhe hue

jis ko teri talab thi guzarta chala gaya

jab tak teri nigah ne taufiq di mujhe

main teri zulf ban ke sanwarta chala gaya

do-hi to kaam the dil-e-nadan ko ai 'adam'

jita chala gaya kabhi marta chala gaya