hai kaisi rashk firdaus-e-barin ye bazm-e-la-sani

hai kaisī rashk firdaus-e-barīñ ye bazm-e-lā-sānī

ki jis par kar rahī hai rahmat-e-haq gauhar-afshānī

rasūloñ meñ mohammad mustafā be-misl-o-yaktā haiñ

ḳhudā yaktā hai jab phir kyuuñ na ho mahbūb-e-lā-fānī

munavvar hai ye saarī bazm-e-anvār-e-ilāhī se

sharīk-e-bazm-e-aqdas ho ke kar lo qalb-e-nūrānī

masīhā se marīz-e-ġham kā chāra ġhair-mumkin hai

mire to dard-e-pinhāñ kī kareñge aap darbānī

ḳhudā hai nāḳhudā mahbūb kī ummat ke beḌe kā

vo ḳhud karatā hai is ummat ke beḌe kī nigahbānī

jo is dar par jhukā aakar milā us ko ḳhudā 'muztar'

hai is dar kī gadā.ī behtaraz taḳht-e-sulaimānī

hai kaisi rashk firdaus-e-barin ye bazm-e-la-sani

ki jis par kar rahi hai rahmat-e-haq gauhar-afshani

rasulon mein mohammad mustafa be-misl-o-yakta hain

KHuda yakta hai jab phir kyun na ho mahbub-e-la-fani

munawwar hai ye sari bazm-e-anwar-e-ilahi se

sharik-e-bazm-e-aqdas ho ke kar lo qalb-e-nurani

masiha se mariz-e-gham ka chaara ghair-mumkin hai

mere to dard-e-pinhan ki karenge aap darbani

KHuda hai naKHuda mahbub ki ummat ke beDe ka

wo KHud karata hai is ummat ke beDe ki nigahbani

jo is dar par jhuka aakar mila us ko KHuda 'muztar'

hai is dar ki gadai behtaraz taKHt-e-sulaimani