phir rahe hain yunhi ek muddat se bazaron mein hum

phir rahe haiñ yūñhī ik muddat se bāzāroñ meñ ham

kah nahīñ sakte ki haiñ kis ke ḳharīdāroñ meñ ham

mujh marīz-e-ġham ko jab dekhā masīhā ne kahā

jis pe tū martā hai haiñ ḳhud us ke bīmāroñ meñ ham

un kī bātoñ par na jā ai dil zarā chitvan bhī dekh

kuchh adā inkār kī paate haiñ iqrāroñ meñ ham

is tamannā meñ dil-e-pur-dāġh haiñ 'ushshāq ke

kaash ban kar phuul gundh jaa.eñ tire hāroñ meñ ham

jin ke dar kī ḳhāksārī karte haiñ jinn-o-malak

haiñ unhīñ ke ai 'sharaf' ik kafash-bardāroñ meñ ham

phir rahe hain yunhi ek muddat se bazaron mein hum

kah nahin sakte ki hain kis ke KHaridaron mein hum

mujh mariz-e-gham ko jab dekha masiha ne kaha

jis pe tu marta hai hain KHud us ke bimaron mein hum

un ki baaton par na ja ai dil zara chitwan bhi dekh

kuchh ada inkar ki pate hain iqraron mein hum

is tamanna mein dil-e-pur-dagh hain 'ushshaq ke

kash ban kar phul gundh jaen tere haaron mein hum

jin ke dar ki KHaksari karte hain jinn-o-malak

hain unhin ke ai 'sharaf' ek kafash-bardaron mein hum