پھر رہے ہیں یونہی اک مدت سے بازاروں میں ہم

پھر رہے ہیں یونہی اک مدت سے بازاروں میں ہم

کہہ نہیں سکتے کہ ہیں کس کے خریداروں میں ہم

مجھ مریض غم کو جب دیکھا مسیحا نے کہا

جس پہ تو مرتا ہے ہیں خود اس کے بیماروں میں ہم

ان کی باتوں پر نہ جا اے دل ذرا چتون بھی دیکھ

کچھ ادا انکار کی پاتے ہیں اقراروں میں ہم

اس تمنا میں دل پر داغ ہیں عشاق کے

کاش بن کر پھول گندھ جائیں ترے ہاروں میں ہم

جن کے در کی خاکساری کرتے ہیں جن و ملک

ہیں انہیں کے اے شرفؔ اک کفش برداروں میں ہم