اپنا مسکن جو مدینے کو بنا لیتے ہیں

اپنا مسکن جو مدینے کو بنا لیتے ہیں

رہ کے دنیا میں وہ جنت کا مزا لیتے ہیں

آتشِ عشق نبی اور بھڑک اٹھتی ہے

ٹھنڈی ٹھنڈی جو مدینے کی ہوا لیتے ہیں

وصل تو رتبۂ عالی ہے یہی کیا کم ہے

دردِ دل روز انہیں جاکے سنالیتے ہیں

اس سے اب بڑھ کے ہو کیا بندہ نوازی کا ثبوت

مجھ سے عاصی کو بھی وہ پاس بلا لیتے ہیں

قابلِ وجد کہی ہے یہ غزل تم نے شرفؔ

جو سمجھتے ہیں وہی اس کا مزا لیتے ہیں