کچھ ہو مجھے نصیب زمانے میں یا نہ ہو

کچھ ہو مجھے نصیب زمانے میں یا نہ ہو

میرا سرِ نیاز ترا آستانہ ہو

دل مجھ سے لے کے غیر کو تم نے دیا نہ ہو

ایسا کیا نہ ہو کہیں ایسا ہوا نہ ہو

شکوہ جفائے یار کا اے دل نہ چاہئے

تیرے بھلے کو کہتا ہوں تیرا برا نہ ہو

ہم تم کو دیکھ آئے ہیں اس دن کسی کے ساتھ

جب تم یہ کہہ رہے تھے کوئی دیکھتا نہ ہو

تم اور میری یاد سے ہوا یسے بے قرار

فقرے یہ اس کو دو جو تمہیں جانتا نہ ہو

رکتے ہیں آنکھ اٹھاتے ہوئے وہ مری طرف

دشمن نے ان کے کان میں کچھ کہہ دیا نہ ہو

کچھ کہتی ہیں شرفؔ کی بھی عاشق مزاجیاں

پوچھو تو تم تمہیں پہ کہیں مبتلا نہ ہو