kar raha hun pesh-e-KHidmat aapko gul-ha-e-hosh

kar rahā huuñ pesh-e-ḳhidmat aap ko gul-hā-e-hosh

yuuñ karam farmā.iye mahfil meñ phir chhā jaa.e hosh

kyuuñ hamārī qaum ġhaflat ke nashe meñ chuur hai

hosh ko be-hoshiyoñ kā kaash kuchh ājāye hosh

'ilm vaalā to adā karatā hai apne farz ko

kitne nādāñ haiñ jo kahte haiñ na ab samjhā.e hosh

ham sabhī apnī tavajjoh deñ usūloñ kī taraf

ba.ad meñ aisā na ho is baat par pachhtā.e hosh

aadmī ko chāhiye zehn-o-nazar se kaam le

zahr-ālūda fazā ko saaf kar mahkā.e hosh

log apnī uñgliyāñ dāñtoñ tale rakh leñ ‘rafīq’

kaam aisā kījiye phir hosh meñ aa jaa.e hosh

kar raha hun pesh-e-KHidmat aap ko gul-ha-e-hosh

yun karam farmaiye mahfil mein phir chha jae hosh

kyun hamari qaum ghaflat ke nashe mein chur hai

hosh ko be-hoshiyon ka kash kuchh aajaye hosh

'ilm wala to ada karata hai apne farz ko

kitne nadan hain jo kahte hain na ab samjhae hosh

hum sabhi apni tawajjoh den usulon ki taraf

baad mein aisa na ho is baat par pachhtae hosh

aadmi ko chahiye zehn-o-nazar se kaam le

zahr-aluda faza ko saf kar mahkae hosh

log apni ungliyan danton tale rakh len ‘rafiq’

kaam aisa kijiye phir hosh mein aa jae hosh