jahan mein apni tasir-e-dua ka puchhna kya hai

jahāñ meñ apnī tāsīr-e-du'ā kā pūchhnā kyā hai

ijābat aake ḳhud kahte haiñ terī iltijā kyā hai

usī ko 'ilm hai dār-e-baqā dār-e-fanā kyā hai

azal se ibtidā jis kī hai us kī intihā kyā hai

phañsāyā mujh ko dām-e-zulf meñ aur ḳhud bhī phañstā hai

ḳhudā ke vāste ai dil batā tujh ko huā kyā hai

firāq-e-yār meñ mujh ko na kyuuñ kar talḳh kā mai ho

na ho pahlū meñ jab dilbar to phir jī kā mazā kyā hai

yahī hasrat rahī dil meñ ki mujh ko dekh kar giryāñ

na pūchhā aap ne ik din ki terā mudda'ā kyā hai

ġhazab hai vasl meñ kahnā kisī kā yuuñ sharārat se

batāo ḳhair to hai aaj dil kā mudda'ā kyā hai

tabī'at us but-e-kāfir pe aa.ī hai 'rahīm'

ġhurūr se aksar jo kahtā hai ḳhudā kyā hai

jahan mein apni tasir-e-du'a ka puchhna kya hai

ijabat aake KHud kahte hain teri iltija kya hai

usi ko 'ilm hai dar-e-baqa dar-e-fana kya hai

azal se ibtida jis ki hai us ki intiha kya hai

phansaya mujh ko dam-e-zulf mein aur KHud bhi phansta hai

KHuda ke waste ai dil bata tujh ko hua kya hai

firaq-e-yar mein mujh ko na kyun kar talKH ka mai ho

na ho pahlu mein jab dilbar to phir ji ka maza kya hai

yahi hasrat rahi dil mein ki mujh ko dekh kar giryan

na puchha aap ne ek din ki tera mudda'a kya hai

ghazab hai wasl mein kahna kisi ka yun shararat se

batao KHair to hai aaj dil ka mudda'a kya hai

tabi'at us but-e-kafir pe aai hai 'rahim'

ghurur se aksar jo kahta hai KHuda kya hai