KHallaq-e-do-alam ka jalwa hai judagana

ḳhallāq-e-do-ālam kā jalva hai judāgāna

kahne kī ye bāteñ haiñ bastī hai ki vīrāna

ham tujh ko kahāñ DhūñDeñ ai jalva-e-jānāna

maġhrib meñ jo ka.aba hai mashriq meñ hai but-ḳhāna

kis dhun meñ chalā aayā ai vaa.iz dīvāna

ye bazm hai rindoñ kī mai-ḳhāna hai mai-ḳhāna

kyā turfa tamāsha hai ai gardish-e-paimāna

zī-hosh hai dīvāna dīvāna hai farzāna

ham vo haiñ haqīqat meñ ai jalva-e-jānāna

paḌtī hai nazar tujh par ka.aba ho ki but-ḳhāna

ik jaam mai-e-vahdat haañ ham ko bhī ai saaqī

ham duur se aa.e haiñ sun kar terā mai-ḳhāna

jin se hai ġharaz ham ko ham saath meñ hoñ un ke

ka.aba ho kalīsā ho girjā ho ki but-ḳhāna

haañ aap se ulfat hai ham aap ke bande haiñ

kāfir hai jo ye samjhe hai aap se yārāna

ham tere haiñ shaidā.ī ham tere tamannā.ī

ham ko hai ġharaz tujh se ka.aba ho ki but-ḳhāna

maḳhlūq ik ā.īna hai nūr-e-haqīqat kā

jalva nazar aatā hai har shai meñ judāgāna

jis nayyar-e-vahdat ne a.alam ko kiyā raushan

us sham-e-haqīqat kā dil hai mirā parvāna

kahne ko haiñ dīvāne matlab meñ haiñ farzāne

ham chhoḌ nahii. sakte hargiz dar-e-jānāna

us shaan ke meñ sadqe phir naaz se tum kah do

'hamzah’ jise kahte haiñ vo hai mirā dīvāna

KHallaq-e-do-alam ka jalwa hai judagana

kahne ki ye baaten hain basti hai ki virana

hum tujh ko kahan DhunDen ai jalwa-e-jaanana

maghrib mein jo kaba hai mashriq mein hai but-KHana

kis dhun mein chala aaya ai waiz diwana

ye bazm hai rindon ki mai-KHana hai mai-KHana

kya turfa tamasha hai ai gardish-e-paimana

zi-hosh hai diwana diwana hai farzana

hum wo hain haqiqat mein ai jalwa-e-jaanana

paDti hai nazar tujh par kaba ho ki but-KHana

ek jam mai-e-wahdat han hum ko bhi ai saqi

hum dur se aae hain sun kar tera mai-KHana

jin se hai gharaz hum ko hum sath mein hon un ke

kaba ho kalisa ho girja ho ki but-KHana

han aap se ulfat hai hum aap ke bande hain

kafir hai jo ye samjhe hai aap se yarana

hum tere hain shaidai hum tere tamannai

hum ko hai gharaz tujh se kaba ho ki but-KHana

maKHluq ek aaina hai nur-e-haqiqat ka

jalwa nazar aata hai har shai mein judagana

jis nayyar-e-wahdat ne aalam ko kiya raushan

us sham-e-haqiqat ka dil hai mera parwana

kahne ko hain diwane matlab mein hain farzane

hum chhoD nahi sakte hargiz dar-e-jaanana

us shan ke mein sadqe phir naz se tum kah do

'hamzah’ jise kahte hain wo hai mera diwana