hai bala-e-na-gahan allah kya azar-e-zulf

hai balā-e-nā-gahāñ allāh kyā azār-e-zulf

dekhte hī dekhte dil ho gayā bīmār-e-zulf

dil nikal kar ho gayā pahlū se jo dildār-e-zulf

ho ga.ī sau jaan se phir jaan bhī ġham-kHvār-e-zulf

lete haiñ 'ushshāq saudā us kā dil se jaan se

kis qadar allāhu akbar garm hai bāzār-e-zulf

ho gayā āġhāz sabza hai bahāroñ par shabāb

baḌh ga.ī ab saath qāmat ke tirī raftār-e-zulf

saañp sā siina pe mere lauTtā hai kyuuñ kahūñ

'ishq kī ik lahar paidā kar gayā dīdār-e-zulf

dil churāyā hai tumhīñ ne tum karo inkār laakh

saaf kahtā hai tumhāre muñh pe ye iqrār-e-zulf

khul gayā jab ġhuncha-e-dil zikr se ruḳhsār ke

bā'is-e-dil-bastagī ho kyuuñ na phir guftār-e-zulf

dekh kar paa.e nazar aage zarā rakhnā qadam

sūrat-e-af’ī hai koī halqa-e-kHamdār-e-zulf

paas us ke hai gul-e-ruḳhsār kī kaisī bahār

yā ilāhī ye rahe phūlā phalā gulzār-e-zulf

dil-farebī us nazākat pe bhī hai madd-e-nazar

us gul-e-ruḳhsār se hargiz na uThtā bār-e-zulf

dil meñ barsoñ se tasavvur thā añdherī raat kā

aa gayā chehra nazar to ho gayā dīdār-e-zulf

kyā batā.eñ tum ko 'bedil' dil hamārā kyā huā

ham bhī de aa.e jo dekhā garm hai bāzār-e-zulf

daam se us ke bachānā dil ko 'bedil' hai muhāl

laakh ’ayyāroñ kā hai ye ek hī ’ayyār-e-zulf

hai bala-e-na-gahan allah kya azar-e-zulf

dekhte hi dekhte dil ho gaya bimar-e-zulf

dil nikal kar ho gaya pahlu se jo dildar-e-zulf

ho gai sau jaan se phir jaan bhi gham-kHwar-e-zulf

lete hain 'ushshaq sauda us ka dil se jaan se

kis qadar allahu akbar garm hai bazar-e-zulf

ho gaya aaghaz sabza hai bahaaron par shabab

baDh gai ab sath qamat ke teri raftar-e-zulf

sanp sa sina pe mere lauTta hai kyun kahun

'ishq ki ek lahar paida kar gaya didar-e-zulf

dil churaya hai tumhin ne tum karo inkar lakh

saf kahta hai tumhaare munh pe ye iqrar-e-zulf

khul gaya jab ghuncha-e-dil zikr se ruKHsar ke

ba'is-e-dil-bastagi ho kyun na phir guftar-e-zulf

dekh kar pae nazar aage zara rakhna qadam

surat-e-af’i hai koi halqa-e-kHamdar-e-zulf

pas us ke hai gul-e-ruKHsar ki kaisi bahaar

ya ilahi ye rahe phula phala gulzar-e-zulf

dil-farebi us nazakat pe bhi hai madd-e-nazar

us gul-e-ruKHsar se hargiz na uThta bar-e-zulf

dil mein barson se tasawwur tha andheri raat ka

aa gaya chehra nazar to ho gaya didar-e-zulf

kya bataen tum ko 'bedil' dil hamara kya hua

hum bhi de aae jo dekha garm hai bazar-e-zulf

dam se us ke bachana dil ko 'bedil' hai muhaal

lakh ’ayyaron ka hai ye ek hi ’ayyar-e-zulf