inayat ka ishaara chahta hun

ināyat kā ishārā chāhtā huuñ

mohabbat ko sañvārā chāhtā huuñ

guzar bhī jaa.eñ do din zindagī ke

tire dar kā sahārā chāhtā huuñ

yahī āñkhoñ kā maqsūd-e-nazar hai

tire ruḳh kā nazārā chāhtā huuñ

nafs ke āmad-o-shud meñ rahe tū

tujhe har dam pukārā chāhtā huuñ

rah-e-ulfat meñ haiñ lākhoñ bayābāñ

junūñ terā sahārā chāhtā huuñ

azal se ġharq huuñ bahr-e-alam meñ

abad kā ab kinārā chāhtā huuñ

hazāroñ zindagī pāūñ to sab ko

mohabbat meñ guzāra chāhtā huuñ

mohabbat ke samundar meñ abas 'kaif'

safīna yā kinārā chāhtā huuñ

inayat ka ishaara chahta hun

mohabbat ko sanwara chahta hun

guzar bhi jaen do din zindagi ke

tere dar ka sahaara chahta hun

yahi aankhon ka maqsud-e-nazar hai

tere ruKH ka nazara chahta hun

nafs ke aamad-o-shud mein rahe tu

tujhe har dam pukara chahta hun

rah-e-ulfat mein hain lakhon bayaban

junun tera sahaara chahta hun

azal se gharq hun bahr-e-alam mein

abad ka ab kinara chahta hun

hazaron zindagi paun to sab ko

mohabbat mein guzara chahta hun

mohabbat ke samundar mein abas 'kaif'

safina ya kinara chahta hun